ویرات کوہلی نے رانجی ٹرافی میں 12 سال بعد واپسی کی لیکن یہ ان کے لیے سود مند ثابت نہ ہوئی اور وہ 15 گیندوں پر صرف 6 رنز بنا کر پویلین لوٹ گئے۔
ویرات کوہلی کی بیٹنگ کو دیکھنے کے لیے 15 ہزار سے زائد شائقین نے میدان کا رخ کیا لیکن جیسے ہی وہ بولڈ ہوئے تو میدان میں خالی ہوگیا اور ویرات کوہلی کی وکٹ فاسٹ بولر ہمانشو سنگوان نے لی۔
ہمانشو سنگوان نے کیریئر کی اہم وکٹ لینے کے بعد پرجوش انداز میں جشن منایا جس کے بعد سوشل میڈیا پر کوہلی کے مداح ان پر تنقید بھی کرنے لگے۔
لیکن ہمانشو سنگوان کون ہیں جنہوں نے کنگ کو ڈگ آؤٹ میں بھیج دیا۔
29 سال کے ہمانشو سنگوان میڈیم پیسر ہیں اور ڈومیسٹک کرکٹ میں ریلوے کی نمائندگی کرتے ہیں، وہ ریلوے کے لیے مستقل پرفارم کرتے ہیں لیکن ویرات کوہلی کی وکٹ انہیں اسپاٹ لائٹ میں لے آئی۔
ہمانشو نے فرسٹ کلاس کرکٹ میں 3.02 کی اکانومی ریٹ سے 23 میچوں میں 77 وکٹیں حاصل کی ہیں۔
لسٹ اے کرکٹ کی 17 اننگز میں 5.28 کی اکانومی ریٹ سے انہوں نے 17 وکٹیں حاصل کررکھی ہیں۔
فاسٹ بولر نے ریلوے کے لیے ایک بار پھر اہم کردار ادا کیا اور دہلی کے خلاف شاندار اسپیل کرکے اپنی قابلیت ثابت کردی۔
ریلوے نے اوپیندرا یادیو کی 95 رنز کی دلکش اننگز کی بدولت 241 رنز بنائے۔
دہلی کی بیٹنگ کے دوران ہمانشو نے پہلی وکٹ اوپنر سنت سنگوان کو 30 رنز پر پویلین بھیجا اس کے بعد ویرات کوہلی اور یش دھل کی وکٹیں حاصل کیں، دہلی نے 4 وکٹوں کے نقصان پر 116 رنز بنائے ہیں۔
