جنوبی افریقا سابق بیٹر ہاشم آملہ نے پاکستان کے محمد آصف کو اپنے کیریئر کا سب سے مشکل ترین بولر قرار دیتے ہوئے کہا ہے کہ ان جیسی جادوئی بولنگ کبھی نہیں دیکھی۔
دنیائے کرکٹ میں بیٹنگ کے کئی عالمی ریکارڈ اپنے نام کرنے والے سابق جنوبی افریقی کرکٹر ہاشم آملہ نے اپنے کیریئر کے دوران پاکستان کے فاسٹ بولر محمد آصف کو مشکل ترین بولر قرار دیا اور کہا ہے کہ ان جیسی جادوئی بولنگ میں نے اپنے پورے کیریئر میں کبھی نہیں دیکھی۔
ہاشم آملہ نے کہا کہ محمد آصف ایک جادوگر بولر تھے، وہ جب گیند کو ڈلیور کرتے تھے تو یہ پتہ ہی نہیں چلتا تھا کہ گیند اندر کی جانب آئے گی یا باہر کی جانب۔
سابق جنوبی افریقی بلے باز کا کہنا تھا کہ آصف گیند کو بہت ہی مہارت سے اوپر اٹھاتے تھے، میں گیند کو چھوڑنے کے لیے بلا اوپر اٹھاتا تھا تو کبھی گیند اندر آکر بلے کو چھوتے ہوئے چلی جاتی تھی اور کبھی گیند اتنی اوپر اٹھ جاتی تھی کہ ایج نکل جاتا تھا۔
ہاشم آملہ کا کہنا تھا کہ اپنے لمبے قد کی وجہ سے محمد آصف گیند کو اچھی لینتھ سے اٹھانے کی صلاحیت رکھتے تھے، ان کی بولنگ کو دیکھ کر بہت مزہ آتا تھا اور ان کا سامنا کرنا مجھے کبھی اچھا نہیں لگا کیونکہ انہیں کھیلتے ہوئے مجھے مشکل پیش آتی تھی۔
واضح رہے کہ ہاشم آملہ نے جنوبی افریقا کی جانب سے 124 ٹیسٹ میچوں میں 9282 جب کہ 181 ایک روزہ میچوں میں 8113 اور 44 ٹی ٹوئنٹی میچوں میں 1277 رنز بنائے تھے۔
