آپ نے اکثر رات کے اوقات کسی بھی قسم کے کیڑے مکوڑوں کو مصنوعی روشنی کے گرد منڈلاتے دیکھے ہوں گے لیکن کیا آپ جانتے ہیں کہ کونسی کشش ان کیڑے مکوڑے کو روشنی کی طرف کھینچتی ہیں۔
تحقیق سے یہ بات سامنے آئی ہے کہ سمتاتی جبلت کے باعث کیڑے دن کے وقت سطح پر اڑ سکتے ہیں اور اپنی پیٹھ کو سورج کی روشنی کی طرف رکھنے کے قابل ہیں، تاہم نئی تحقیق سے پتہ چلتا ہے کہ وہ اندھیرے میں مصنوعی روشنی میں یہ صلاحیت کھو دیتے ہیں۔
امپیریل کالج لندن اور فلوریڈا انٹرنیشنل یونیورسٹی کے ماہرین حیاتیات نے وضاحت کی کہ کیڑے مصنوعی روشنی کو اندھیرے میں کھلے آسمان سے آنے والی تصور کرتے ہیں۔
تحقیق کے مطابق اس روشنی میں وہ اپنے آپ کو اوپر اور نیچے کے محور کے ساتھ رخ کرتے ہیں، اس کے بعد جبلت انہیں روشنی کی طرف واپس جانے کا اشارہ کرتی ہے جو بظاہر بے ترتیب پرواز کے راستے بناتی ہے۔
سائنسدان پہلے ہی خبردار کر چکے ہیں کہ بڑھتی ہوئی مصنوعی روشنی کی وجہ سے دنیا بھر میں کیڑے مکوڑوں کی آبادی تیزی سے کم ہو رہی ہے، جبکہ کیڑے مار ادویات کا استعمال اور موسمیاتی تبدیلیاں بھی کیڑوں کی تعداد میں کمی کا باعث بنی ہیں جو کہ فطرت کیلئے انتہائی ہی خطرناک ہے۔
سائنسدان کہتے ہیں کہ اگر ہم دنیا سے تمام کیڑے مکوڑے نکال دیں تو ہم بھی مر جائیں گے، ماہرین کہتے ہیں یہ کیڑے مکوڑے خوراک کی پیداوار اور ایکو سسٹم کو محفوظ رکھنے میں اہم کردار ادا کرتے ہیں۔
واضح رہے کہ اس تحقیق کے لیے سائنسدانوں کی ایک ٹیم نے لیبارٹری میں ہائی ریزولوشن موشن کیپچر اور فیلڈ میں اسٹیریو ویڈیوگرافی کو استعمال کیا تاکہ مصنوعی روشنیوں کے ارد گرد کیڑے کی پروازوں کے تھری ڈی کائینیٹکس کو دوبارہ تشکیل دیا جا سکے۔
ماہرین نے کوسٹا ریکا کی لیب اور جنگلات میں لائٹ بلب کے گرد اڑنے والی مصنوعی روشنیوں کے گرد پرواز کرتی بھنبھیریوں، تتلیوں، پتنگوں کا مشاہدہ کیا۔
