The news is by your side.

شان مسعود کیوں ٹیم میں جگہ نہ بناسکے؟ چیف سلیکٹر نے بتادیا

لاہور: پاکستان کرکٹ بورڈ (پی سی بی) کے چیف سلیکٹر محمد وسیم نے شان مسعود اور فاسٹ بولر حسن علی کو ٹیم میں شامل نہ کرنے کی وجہ بیان کردی۔

تفصیلات کے مطابق ایشیا کپ اور دورہ نیدرلینڈ کے لئے قومی اسکواڈ کے اعلان کے بعد صحافیوں سے گفتگو کرتے ہوئے چیف سلیکٹرمحمد وسیم نے کہا کہ ٹیم کی تشکیل سے قبل کوچ اور کپتان سے مشاورت کی، مشاورت کے بعد ہی ایک وکٹ کیپر کو ٹیم میں شامل کیا گیا۔

انہوں نے کہا کہ وائٹ بال کرکٹ میں ہماری ٹیم کی کارکردگی خاصی بہتر ہے،قومی اسکواڈ زیادہ تر نوجوان کھلاڑیوں پر مشتمل ہے، اسکواڈ میں کچھ کھلاڑی ایسے ہیں جو ابھی نہیں کھیلے۔

فاسٹ بولر حسن علی کو ٹیم میں شامل نہ کرنے کی وجہ بیان کرتے ہوئے چیف سلیکٹر نے کہا کہ حسن علی کے میچ ونر ہونے میں کوئی شک نہیں مگر نسیم شاہ کی ڈومیسٹک کرکٹ میں وائٹ بال کرکٹ پرفارمنس دیکھتےہوئے موقع دیا۔

اس کے علاوہ نسیم شاہ ٹیسٹ میں کامیاب رہا، امید ہے کہ وہ ٹیسٹ کی طرح ون ڈے میں بھی اچھا پرفارم کرسکے گا۔

ان فارم بیٹر شان مسعود سے متعلق محمد وسیم کا کہنا تھا کہ شان مسعود اس وقت اچھی فارم میں ہیں مگران کی جگہ نہیں بن رہی۔

یہ بھی پڑھیں: دورۂ نیدرلینڈز، ٹی ٹوئنٹی ایشیا کپ کے لیے قومی اسکواڈز کا اعلان

دورہ ایشیا اور نیدرلینڈ کے لئے ٹیم میں ایک وکٹ کیپر کو شامل کرنے سے متعلق سوال پر چیف سلیکٹر کا کہنا تھا کہ ایشیا کپ میں پندرہ رکنی ٹیم نے جانا ہے،مشاورت کے بعد ایک وکٹ کیپر کو ٹیم میں شامل کیا گیا۔

واضح رہے کہ آج پاکستان کرکٹ بورڈ نے دورۂ نیدرلینڈز اور اے سی سی ٹی ٹوئنٹی ایشیا کپ کے لئے قومی اسکواڈ کا اعلان کیا۔

فاسٹ بولر حسن علی کو آرام دینے کا فیصلہ کیا گیا جبکہ شان مسعود ٹیم میں جگہ نہ بناسکے۔

Comments

یہ بھی پڑھیں