قومی ٹیم کے اوپنر فخر زمان کی بھارت کے خلاف میچ میں شمولیت کا فیصلہ اسکین کے بعد ہوگا۔
اے آر وائی نیوز کے مطابق ذرائع کا کہنا ہے کہ اوپنر بیٹر فخر زمان کا اسکین صبح ہوگا جس کے بعد ان کی بھارت کے خلاف میچ میں شمولیت کا فیصلہ کیا جائے گا۔
فخر زمان نے سینے کے دائیں جانب تکلیف کی شکایت کی ہے۔
واضح رہے کہ فخر زمان نے نیوزی لینڈ کے خلاف میچ میں 24 رنز بنائے اور بیٹنگ کے دوران بھی وہ تکلیف میں دکھائی دیے اور میدان میں فزیو کو بھی طبی امداد کے لیے بلایا۔
نیوزی لینڈ کے بیٹنگ کے دوران شاہین آفریدی کے پہلے ہی اوور میں فخر زمان باؤنڈری لائن پر انجری کا شکار ہوئے تھے جس کے بعد وہ میدان سے باہر چلے گئے تھے۔
فخر زمان میدان سے باہر جانے کی وجہ سے اننگز اوپن نہیں کرسکے اور انہیں 20 منٹ کی تاخیر سے بیٹنگ کے لیے بھیجا گیا ان کی جگہ سعود شکیل کو اننگز کا آغاز کرنے کے لیے بھیجا گیا تھا۔
یاد رہے کہ نیوزی لینڈ نے چیمپئنز ٹرافی کے پہلے میچ میں پاکستان کو 60 رنز سے شکست دے دی اب پاکستان کو سیمی فائنل میں پہنچنے کے لیے بھارت اور بنگلادیش کو ہرانا لازمی ہوگا۔
چیمپئنز ٹرافی کے دوسرے میچ میں پاکستان اور بھارت کی ٹیمیں اتوار 23 فروری کو مدمقابل آئیں گی جبکہ کل دوسرے میچ میں بنگلادیش اور بھارت کی ٹیمیں ٹکرائیں گی۔
