شادی کے 54 برس بعد خاتون کے ہاں بچے کی پیدائش

بھارت میں معمر جوڑا خبروں کی زینت بن گیا جس کی وجہ ان کے ہاں 54 برس بعد پیدا ہونے والے بچے کی پیدائش ہے۔

بھارتی میڈیا رپورٹ کے مطابق ریاست راجستھان کے الوار ضلع میں بڑی عمر کے میاں بیوی کے ہاں شادی کے 54 سال بعد پہلی اولاد ہوئی۔

بھارتی میڈیا کا کہنا ہے کہ یہ جوڑا ہریانہ بارڈر کے نزدیک واقع ایک علاقے کا رہائشی ہے جو کافی جدوجہد کے بعد فرٹیلیٹی سینٹر پہنچا جس کے بعد انہیں اولاد کی خوشی نصیب ہوئی۔

میڈیا رپورٹ کے مطابق ماں اور بچہ دونوں صحت مند ہیں جب کہ بچے کا وزن ساڑھے تین کلو ہے۔

بھارتی میڈیا کا بتانا ہےکہ خاتون کی عمر 75 اور ان کے شوہر کی عمر 70سال ہے جب کہ ان کے ہاں ان وٹرو فرٹیلائزیشن ( آئی وی ایف ) کے ذریعے اولاد پیدا ہوئی۔

سوشل میڈیا صارفین کی جانب سے بھی معمر جوڑے کو بچے کی پیدائش کی مبارک باد دی جارہی ہے.

Comments