اسمارٹ فون کے استعمال کے جہاں فائدے ہیں وہیں اس کے نقصانات سے متعلق بھی ماہرین کی جانب سے آگاہ کیا جاتا ہے۔
بھارتی میڈیا رپورٹس کے مطابق ریاست حیدرآباد میں ایک خاتون اندھیرے میں اسمارٹ فون استعمال کرنے کی عادت پر بینائی سے محروم ہوگئی۔
نیورولوجسٹ ڈاکٹر سدھیر کا کہنا ہے کہ اندھیرے میں اسمارٹ فون استعمال کرنے کے معمول کے رویے کی وجہ تیس سالہ خاتون کی بینائی کو نقصان پہنچا ہے۔
ڈاکٹر نے انکشاف کیا کہ منجو نامی مریض ان کے پاس فلوٹرز، روشنی کی تیز چمک، تاریک زگ زیگ پیٹرن اور بینائی کی کمی کی وجہ سے آئیں۔
انہوں نے کہا کہ جب خاتون کا معائنہ کیا گیا تو ان میں اسمارٹ فون ویژن سنڈروم کی تشخیص ہوئی جس کی وجہ سے انہیں اندھے پن کا سامنا بھی کرنا پڑسکتا ہے۔
ڈاکٹر کے مطابق خاتون بیوٹیشن کے شعبہ سے منسلک تھیں تاہم انہوں نے اپنے خصوصی بچے کی دیکھ بھال کے لیے نوکری چھوڑی اور رات کا اکثر وقت اسمارٹ فون استعمال کرنے میں گزارنے لگیں۔
خاتون کو دوائیوں کے ساتھ اسکرین ٹائم کم کرنے کی ہدایت کی گئی جس کے بعد وہ اپنی بینائی بحال کرنے میں کامیاب ہوگئیں۔
ڈاکٹر سدھیر نے مشورہ دیا ہے کہ اسمارٹ فون استعمال کرتے ہوئے ہر بیس منٹ کے بعد بیس سیکنڈز کا بریک لیں اور اس دوران اسکرین کی جانب نہ دیکھیں۔
