بھارت کے حیدرآباد میں ذہنی طور پر متاثرہ خاتون نے موبائل فون نگل لیا، جس کے باعث خاتون اپنی جان سے ہاتھ دھو بیٹھی۔
بین الاقوامی خبر رساں ادارے کی رپورٹ کے مطابق ڈاکٹروں کی جانب سے خاتون کو بچانے کی ہر ممکن کوشش کی گئی مگر کوئی کوشش کامیاب نہ ہوسکی۔ یہ واقعہ ریاست آندھرا پردیش کے کاکیناڈا ضلع کے راجہ مہیندرا ورم میں پیش آیا۔
رپورٹس کے مطابق بومورو گاؤں سے تعلق رکھنے والی 35 سالہ پنوملا رامیا اسمرتی جو گزشتہ پندرہ سال سے ذہنی مریضہ تھی، حالت زیادہ خراب ہونے پر اسے سرکاری اسپتال میں داخل کروایا گیا، اسپتال کے بیڈ پر خاتون نے موبائل فون نگل لیا۔
بھارتی میڈیا رپورٹس کے مطابق خاتون کے گھر والے جب اس کے بیڈ کے پاس پہنچے اور موبائل تلاش کیا تو وہ کہیں نہیں ملا۔ جس پر خاتون نے بتایا کہ اس نے موبائل فون نگل لیا ہے۔
معاملہ سامنے آنے پر ڈاکٹروں کو بتایا گیا، ڈاکٹروں نے فوری طور پر سرجری کی اور سیل فون نکالنے کی کوشش کی۔ سیل فون نگل لینے کی وجہ سے خاتون کی غذائی نالی پہلے ہی بہت زیادہ متاثر ہوچکی تھی۔
خاتون نے فلائٹ چھوٹ جانے کا غصہ ٹیکسی ڈرائیور پر اتار دیا، ویڈیو وائرل
ڈاکٹروں کی ہدایت کے بعد خاتون کو دوسرے اسپتال منتقل کیا گیا، مگر وہاں بھی ڈاکٹر خاتون کی زندگی بچانے میں ناکام رہے۔
