کراچی : خاتون نے بلی کو فالج ہونے پر نارتھ ناظم آباد میں سینئر پیٹ ڈاکٹر کو پٹوا دیا تاہم ڈاکٹر نے خاتون سمیت دیگر کے خلاف مقدمہ درج کرادیا۔
تفصیلات کے مطابق کراچی میں خاتون نے سینئر پیٹ ڈاکٹر کی پٹائی کروا ڈالی ، ڈاکٹر امیرحمزہ نے پٹائی پر خاتون سمیت دیگر کیخلاف مقدمہ درج کرادیا۔
ایف آئی آر میں جان سے مارنے کی دھمکیاں، ٹیلگراف اور دیگر فعات شامل کی گئی ہیں ، ایف آئی آر کے متن میں کہا گیا ہے کہ 19 جون کو کام کے دوران خاتون صائمہ عدنان اپنی بلی کے ہمراہ آئی، صائمہ نے کہا بلی اینوکو غلط علاج کے باعث فالج ہوگیا ہے۔
مدعی ڈاکٹر امیرحمزہ کا کہنا تھا کہ بلی کھانا نا کھانے کی وجہ سے کافی کمزور ہوگئی تھی، خاتون کو ٹیسٹ کا کہا تو انہوں نے انکار کردیا اور صائمہ عدنان نے شور شرابہ اور چلانا شروع کردیا تھا۔
مدعی مقدمے نے بتایا کہ 15 منٹ بعد ایک جوان اور ایک ادھیڑ عمر اسپتال میں داخل ہوئے، مسلح افراد بار بار اپنے نیفے کو ہاتھ لگا رہے تھے، ایک جوان حسن نے مجھے دھکے دیے اور تھپڑ مارے۔
ڈاکٹر کا کہنا تھا کہ ساتھیوں کی مدد سے مجھے اسپتال سے باہر نکال کر تشدد کیا، مجھے جعلی ڈاکٹر کہا اور ویڈیو بناتے رہے، میرا استحصال کیا اور ویڈیو سوشل میڈیا پر بھی پوسٹ کردی، ملزمان کے خلاف کارروائی کی جائے۔
