کراچی : بچوں کی مناسب دیکھ بھال اور ان کی بہتر تربیت کیلئے محکمہ سندھ پولیس نے ایک قابل تعریف اقدام کرتے ہوئے چلڈرن کارنر قائم کیا ہے۔
کراچی کی ساؤتھ زون پولیس کے ویمن تھانہ شاہراہ فیصل پر گمشدہ، لاوارث، گداگری سمیت مختلف مقدمات میں آنے والے بچوں کی دیکھ بھال کیلئے چلڈرن کارنر کے نام سے ایک خوبصورت سا کمرہ تیار کیا گیا ہے۔
اس خوبصورت سے کمرے میں بچوں کے کھیلنے کیلئے گیمز، کھلونوں کے علاوہ پینٹنگز بھی موجود ہیں جو بچوں کی دلچسپی کا بہترین ذریعہ ہیں۔ اس کمرے کا ماحول بھی اسکولوں میں چلڈرنز روم جیسا ہے۔
اس حوالے سے ڈی آئی جی ساؤتھ جاوید اکبر ریاض کی جانب سے سینٹر کا افتتاح کیا گیا، اس موقع پر اے آر وائی نیوز سے گفتگو کرتے ہوئے انسپکٹر زاہدہ پروین نے بتایا کہ اس اقدام کا مقصد تھانے آنے والے بچوں میں جو خوف ہے اسے دور کیا جاسکے۔
اسسٹنٹ کمشنر ساؤتھ کا کہنا تھا کہ اس پروگرام میں شہری انتطامیہ اور پولیس مل کر کام کررہی ہے۔ اس پروگرام کا مقصد یہ ہے کہ جو بچے یا خواتین گداگری یا کسی اور جرم میں تھانے آتے ہیں ان کو محفوظ ماحول فراہم کیا جائے۔
