دنیا بھر کے دیگر ممالک کی طرح پا کستان میں بھی ہڈیوں کے امراض کا عالمی دن (ورلڈ آ رتھر ا ئٹس ڈے) منایا جارہا ہے۔
ورلڈ آرتھرائٹس ڈے ہر سال 12 اکتوبر کو منایا جاتا ہے، یہ دن منانے کا بنیادی مقصد ہڈیوں کے امراض، جوڑوں کے درد کی علامات، وجوہات، احتیاطی تدابیر،پرہیز و دیگر امور پر بیداری فراہم کرنا ہے۔
آج کے دن دنیا بھر کے طبی ماہرین اس حوالے سے آگاہی فراہم کرتے ہیں، ورلڈ آرتھرائٹس ڈے 2023 کا تھیم سب کے لئے مشترکہ صحت رکھا گیا ہے، اس کا بنیادی مقصد اس بات کو یقینی بنانا ہے کہ زیادہ سے زیادہ افراد کو جوڑوں سے متعلق بیماریوں کی روک سے متعلق آگاہ کیا جاسکے۔
ہمارے معاشرے میں لاکھوں افراد جوڑوں کے درد کے مسائل سے دوچار ہیں، جوڑوں کے درد کے بارے میں عالمی مہم 1996 میں آرتھرائٹس اینڈ ریو میٹزل انٹرنیشنل (اے آر آئی) تنظیم کی جانب سے شروع کی گئی تھی، اس کے بعد سے ہر سال ورلڈ آرتھرائٹس ڈے منایا جاتا ہے۔
غیر متوازن خوراک اور دیگر عوامل کے باعث آج کل جوڑوں کا درد عام ہوتا جارہا ہے جس سے نجات پانے کا انتہائی آسان قدرتی ذریعہ ہم آپ کو بتا رہے ہیں۔
جوڑوں کا درد انتہائی تکلیف دہ ہوتا ہے۔ پہلے کبھی جوڑوں کا درد صرف بوڑھوں کی بیماری تصور کیا جاتا ہے تاہم بدلتے وقت کے ساتھ تیز رفتار زندگی میں صحت کے اہم اصولوں کو نظر انداز کرنے، سونے جاگنے کے معمولات میں تبدیلی اور غیر متوازن خوراک کے باعث اب نوجوان اور کم عمر افراد بھی جوڑوں کے درد میں مبتلا ہو رہے ہیں تاہم قدرت کی ایسی بیش بہا نعمتیں ہیں جن کے ذریعے ہم کئی بیماریوں سے نجات پا سکتے ہیں۔
جوڑوں کے درد کے مریضوں کے لیے گوند کا استعمال انتہائی پر تاثیر دوا ہے اور استعمال انتہائی آسان ہے۔
مکس گوند لیں اور اس کو دیسی گھی میں اچھی طرح پکا لیں کہ وہ پھول جائے پھر اس کو پیس کر روزانہ ایک چوتھائی چمچ دودھ کے ایک گلاس میں شامل کرکے استعمال کریں جو دودھ نہیں پیتے وہ پانی سے دن میں دو بار استعمال کر سکتے ہیں۔
بزرگوں کے لیے قابل ہضم بنانے کے لیے اس میں پانچ دانے بڑی الائچی کے بھی شامل کرلیں۔
اس میں کوئی شہد یا دیگر میٹھی چیز کا استعمال ہرگز نہ کریں بہتر ہے کہ شام چار بجے سے قبل اس کو استعمال کرلیں اور ایک بات کا خاص دھیان رکھیں کہ اس کو کھانے کے بعد ایک گھنٹے تک لیٹنا یا سونا نہیں ہے۔ کھانے کے بعد چہل قدمی کریں یا بیٹھ کر کوئی سرگرمی کرلیں تاکہ یہ اچھی طرح ہضم ہوسکے۔
جن افراد کے جوڑوں بالخصوص گھٹنوں کے جوڑوں کے چٹخنے کی آوازیں آتی ہیں وہ ساگو دانا پیس کر رکھ لیں اور روزانہ نہار منہ ایک چمچ ساگو دانا سفوف ایک گلاس تیز گرم دودھ میں شامل کرکے پی لیں۔
پانچ سے سات دن میں جوڑوں کا درد اور آوازیں آنی بند ہو جائیں گی، یہ بے ضرر دوا ہے اور اگر مریض علاج کے لیے کوئی اور دوا استعمال کرتے ہیں تو وہ بھی یہ لے سکتے ہیں۔
