افغانستان کرکٹ ٹیم نے نیدرلینڈز کو 7 وکٹوں سے شکست دے کر ورلڈ کپ میں چوتھی کامیابی حاصل کرلی، افغان ٹیم پوائنٹس ٹیبل پر 8 پوائنٹس کے ساتھ پانچویں نمبر پر آگئی۔
لکھنؤ میں کھیلے گئے ورلڈ کپ کے 34ویں میچ میں افغانستان نے نیدرلینڈز کی جانب سے دیا جانے والا 180 رنز کا ہدف 31.3 اوورز میں 3 وکٹوں کے نقصان پر حاصل کرلیا۔
کپتان حشمت اللہ شاہدی نے 56 رنز کی ناقابل شکست اننگز کھیلی، رحمت شاہ 52 رنز کے ساتھ نمایاں رہے، عظمت اللہ عمرزئی 31 رنز بناکر ناٹ آؤٹ رہے۔
اوپنر رحمان اللہ گرباز 10 رنز بناکر آؤٹ ہوئے، ابراہیم زدران 20 رنز بنا کر وین ڈر مروے کا نشانہ بنے۔
نیدرلینڈز کی جانب سے لوگن وین بیک، وین ڈر مروے اور ثاقب ذوالفقار نے ایک، ایک وکٹ حاصل کی۔
اس سے قبل نیدرلینڈ پوری ٹیم 179 رنز پر ڈھیر ہوگئی تھی، افغانستان کو جیت کے لیے 180 رنز کا ہدف دیا تھا۔
نیدرلینڈز کے کپتان نے ٹاس جیت کر افغانستان کے کپتان کو پہلے بولنگ کی دعوت دی تھی۔
نیدرلینڈز کی ٹیم افغان بولرز کے سامنے ناکام نظر آئی اور 47 ویں اوور میں 179 رنز پر آل آؤٹ ہوگئی، نیدرلینڈز کی طرف سے سائبرانڈ 58 رنز بنا کر ٹاپ اسکورر رہے۔
نیدرلینڈز کی جانب سے اوپنر بیٹسمین ویسلے بیریسی اور میکس ڈوڈ نے کیا لیکن ویسلے بیریسی میچ کے پہلے اوورز میں ہی مجیب الرحمان کی پانچویں گیند پر ایک رن بناکر آؤٹ ہوگئے۔
اس کے علاوہ نیدرلینڈ کے میکس ڈوڈ کو 42 رنز، کولن ایکرمین 29 رنز، اسکاٹ ایڈورڈز صفر، بیسڈی لیڈی 3 رنز بناکر آؤٹ ہوگئے، وین ڈر مروے11، وین میکرین 4 اور ثاقب ذوالفقار نے 3 رنز اسکور کیے جبکہ آریان دت 10 رنزبناکر ناٹ آؤٹ رہے۔
افغانستان کے محمد نبی نے 3 وکٹیں حاصل کیں، نور احمد نے 2 اور مجیب الرحمان نے ایک کھلاڑی کو آؤٹ کیا۔
