ورلڈ کپ میں کم بیک کرنے کا مشن لیے قومی کرکٹ ٹیم اگلے مقابلے کے لیے احمد آباد سے بنگلورو پہنچ گئی ہے جہاں وہ جمعے کو آسٹریلیا سے ٹکرائے گی۔
اے آر وائی نیوز کے مطابق آئی سی سی ون ڈے ورلڈ کپ کے لیے پاکستان کرکٹ ٹیم نے احمد آباد میں بھارت سے شکست کے بعد اپنے اگلے میچ کے لیے بنگلورو میں پڑاؤ ڈال لیا ہے۔
قومی ٹیم کپتان بابر اعظم کی قیادت میں بنگلورو پہنچی جہاں ہوٹل پہنچنے پر ٹیم اراکین کا روایتی انداز میں استقبال کیا گیا اور ہوٹل انتظامیہ کی جانب سے کھلاڑیوں اور اسٹاف کو شال اور گلدستوں کے تحائف پیش کیے گئے۔
#DattKePakistani | #WeHaveWeWill pic.twitter.com/9CInUAEs2K
— Pakistan Cricket (@TheRealPCB) October 15, 2023
اس موقع پر ہوٹل میں موجود قومی ٹیم کے مداحوں نے کھلاڑیوں کے ساتھ تصاویر بھی بنوائیں۔
گرین شرٹس جمعہ 20 اکتوبر کو چنا سوامی اسٹیڈیم میں ریکارڈ پانچ بار کی عالمی چیمپئن کینگروز سے مدمقابل ہوں گے۔
پاکستان نے میگا ایونٹ میں اب تک تین میچ کھیلے ہیں جس میں سے دو میچ جیت رکھے ہیں جب کہ آسٹریلیا کو ٹورنامنٹ میں اپنی پہلی فتح کی تلاش ہے۔
اس وقت ورلڈ کپ ٹیم رینکنگ کی ٹاپ چار ٹیموں میں بھارت، نیوزی لینڈ، جنوبی افریقہ اور پاکستان بالترتیب پہلی سے چوتھی پوزیشن پر موجود ہیں۔
