لکھنؤ: ورلڈ کپ کے 19ویں میچ میں سری لنکا نے نیدرلینڈز کو پانچ وکٹوں سے شکست دے دی۔
لکھنؤ میں کھیلے گئے میچ میں سری لنکا نے نیدرلینڈز کی جانب سے دیا جانے والا 263 رنز کا ہدف 48.2 اوورز میں 5 وکٹوں کے نقصان پر حاصل کرلیا۔
سدھیرا سماراوکرما نے 91 رنز کی ناقابل شکست اننگز کھیلی، ناسانکا نے 54 رنز بنائے، چرتھ اسالنکا 44 رنز کے ساتھ نمایاں رہے۔
کوشل پریرا 5 رنز بنا کر آؤٹ ہوئے، کوشل مینڈس 11 رنز بنا کر پویلین لوٹ گئے۔
نیدرلینڈز کی جانب سے اریان دت نے تین وکٹیں حاصل کیں، کولن ایکرمین ایک وکٹ حاصل کرسکے۔
نیدر لینڈز نے سری لنکا کے خلاف ٹاس جیت کر بیٹنگ کا فیصلہ کیا اور 263 رنز کا ہدف دیا۔
نیدرلینڈز کی جانب سے سائبرینڈ اینجل بریکٹ 70 رنز بناکر ٹاپ اسکورر رہے، اس کے علاوہ لوگن وین بیک نے 59 رنز بنائے۔
سری لنکا کی جانب سے دلشان مدھوشانکا اور کاسون راجیتھا نے چار چار وکٹیں حاصل کیں، اس کے علاوہ مہیش ٹھیکشانہ نے 1 وکٹ لی۔
نیدر لینڈز کے کپتان اسکاٹ ایڈورڈ نے ٹاس کے موقع پر بات کرتے ہوئے کہا کہ وکٹ اچھی لگ رہی ہے، ٹیم میں کوئی تبدیلی نہیں کی ہے، سری لنکا کے کپتان کوشال مینڈس نے کہا کہ ٹیم میں 2 تبدیلیاں کی ہیں۔
واضح رہے کہ گزشتہ روز آسٹریلیا نے ورلڈکپ کے 18ویں میچ میں پاکستان کو 62 رنز سے شکست دی۔
