آئی سی سی ٹی 20 ورلڈ کپ کے فائنل میں پاکستان اور انگلینڈ کی ٹیمیں 13 نومبر کو مدمقابل آئیں گی۔
پاکستان نے نیوزی لینڈ کی جانب سے دیا گیا 153 رنز کا ہدف آخری اوور میں حاصل کیا، کپتان بابر اعظم اور محمد رضوان نے شاندار نصف سنچریاں اسکور کرکے قومی ٹیم کی جیت میں اہم کردار ادا کیا۔
فاسٹ بولر شاہین شاہ آفریدی نے شاندار بولنگ کرتے ہوئے 2 وکٹیں حاصل کی تھیں جبکہ محمد نواز نے ایک وکٹ حاصل کی تھی۔
قومی ٹیم کی کارکردگی کی تعریف ناصرف موجودہ و سابق کرکٹرز بلکہ دیگر ٹیموں کے سابق کھلاڑیوں کی جانب سے بھی کی جارہی ہے۔
سابق ویسٹ انڈین کرکٹر این بشپ کے بعد جارح مزاج بیٹر شیرفون ردر فورڈ نے بھی قومی ٹیم کی بولنگ لائن کی تعریف کی ہے۔
پی ایس ایل میں پشاور زلمی کی نمائندگی کرنے والے ردرفورڈ نے کہا کہ ’ہر کسی کو پاکستانی ٹیم پر فخر ہونا چاہیے وہ دنیائے کرکٹ کو سکھا رہے ہیں کہ مشکل پچوں پر اتنی آسانی سے کیسے بیٹنگ کی جاتی ہے۔‘
Everyone should be proud of them, They are teaching world cricket how to bat on difficult pitches so easily #T20Iworldcup2022 #PakvsNz #PakistanCricket #BabarAzam pic.twitter.com/ibDZJHhQVn
— Ruthless Rutherford (@SRutherford_50) November 9, 2022
واضح رہے کہ بھارتی ٹیم انگلش ٹیم کے ہاتھوں عبرتناک شکست کے بعد باہر ہوگئی، ویرات کوہلی اور ہاردک پانڈیا کی نصف سنچریاں بھی بھارت کو شکست سے نہ بچاسکیں۔
انگلش اوپنر ایلکس ہیلز کو شاندار 85 رنز کی اننگز کھیلنے پر میچ کا بہترین کھلاڑی قرار دیا گیا، ہیلز کی شاندار اننگز میں 7 چھکے اور 4 چوکے شامل تھے، دوسرے اینڈ سے جوز بٹلر نے بھی ہیلز کا خوب ساتھ دیتے ہوئے 80 رنز کی اننگز کھیلی۔
