ون ڈے انٹرنیشنلز میں سال 2023 کے دوران بھارتی اور پاکستانی بولرز چھائے رہے، سب سے زیادہ وکٹیں لینے کا اعزاز دنوں ممالک کے بولرز کے نام رہا۔
تفصیلات کے مطابق 2023 میں ون ڈے کرکٹ میں ایشیائی بولرز کا جلوہ قائم رہا۔ اس سال سب سے زیادہ وکٹیں لینے کے معاملے میں ٹاپ فائیو بولرز میں بھارت اور پاکستان کے بولرز موجود ہیں۔ ٹاپ پر کلدیپ یادو جبکہ نمبر پانچ پر حارث رؤف ہیں۔
بھارتی لیگ اسپنر کلدیپ یادیو نے اس سال شاندار کارکردگی کا مظاہرہ کیا۔ انھوں نے 29 میچز میں 49 وکٹیں حاصل کیں جبکہ ان کا اوسط 20.48 رہا۔ ان کی بہترین کاکردگی 25 رنز دے کر 5 وکٹیں حاصل کرنا رہی۔
دوسرے نمبر پر بھارت کے محمد سراج رہے، پیسر نے 44 وکٹیں اپنے نام کرنے کے لیے 24 اننگز کا سہارا لیا۔ ان کی اوسط 20.68 رہی۔
تیسرے نمبر پر ورلڈکپ میں عمدہ کاکردگی دکھانے والے محمد شامی رہے۔ پیسر نے اس سال بہترین پرفارمنس کا مظاہرہ کیا اور محض 19 میچز میں 43 وکٹیں حاصل کیں۔ ان کی اوسط 16.46 رہی۔
India and Pakistan dominate the men's wicket-taking list in ODIs this year 👏 pic.twitter.com/092VvmtkvG
— ESPNcricinfo (@ESPNcricinfo) December 23, 2023
پاکستان کے شاہین شاہ آفریدی بھی اپنی عمدہ کارکردگی سے چھائے رہے، انھوں نے 21 ون ڈے میچز میں 42 وکٹیں حاصل کیں۔ ان کی اوسط 21.04 رہی جبکہ وہ اپنے کیریئر میں پہلی بار ون کے ٹاپ بولر کے اسپاٹ پر بھی براجمان رہے۔
حارث رؤف بھی ون ڈے کے ٹاپ فائیو میں جگہ بنانے میں کامیاب رہے۔ پیسر نے 2023 کے دوران 27.15 کی اوسط سے 22 مقابلوں میں 40 وکٹیں اپنے نام کیں۔
اس کے علاوہ چھٹے نمبر پر آسٹریلیا کے ایڈم زمپا، ساتویں نمبر پر سری لنکا کے مہیش ٹکشنا، آٹھویں نمبر پر جنوبی افریقہ کے مارکو جانسن، نویں نمبر پر بنگلہ دیش کے شریف الاسلام جبکہ دسویں نمبر پر پروٹیز پیسر جیرالڈ کوٹزی رہے۔
