عدن : یمن کے ساحلی شہر الحدیدہ میں بارودی سرنگ کے تین دھماکوں میں ایک بچے اور ایک خاتون سمیت پانچ افراد ہلاک ہوگئے۔
غیر ملکی خبر رساں ادارے کی رپورٹ کے مطابق مذکورہ اطلاع ایک فوجی اہلکار نے دی ہے۔ نام ظاہر نہ کرنے کی شرط پر اہلکار نے بتایا کہ یہ دھماکے حوثی باغیوں کی جانب سے برسوں پہلے بچھائی گئی بارودی سرنگوں میں ہوئے۔
اہلکار نے بتایا کہ پہلا دھماکہ حدیدہ کے جنوبی حصے میں اس وقت ہوا جب ایک موٹر سائیکل پہلے سے بچھائی گئی بارودی سرنگ سے ٹکرا گئی۔
اس واقعے میں ایک بچے سمیت تین افراد موقع پر ہی ہلاک ہوگئے۔ انہوں نے بتایا کہ ایک اور واقعے میں الحدیدہ کے الحلی ضلع میں دھماکہ خیز مواد کے پھٹنے سے ایک خاتون ہلاک ہوئی۔
اہلکار نے بتایا کہ حدیدہ کے ہیج ضلع میں بارودی سرنگ کے ایک اور دھماکے میں ایک شخص ہلاک اور اس کا بچہ زخمی ہوگیا۔ وہ دونوں اپنے گھر واپس جا رہے تھے۔
5 قابل ذکر بات یہ ہے کہ یمن میں بارودی سرنگوں کی صفائی کے حوالے سے ویب سائٹ پر شائع ہونے والے تازہ ترین اعداد و شمار کے مطابق اس منصوبے کے تحت 2018 کے وسط تک یمن بھر سے339,431بارودی سرنگیں ہٹادی جاچکی ہیں۔
