فیصل آباد: حیدرآباد ٹاؤن کے محلہ عثمان غنی میں مہندی کی تقریب میں فائرنگ سے 20 سالہ نوجوان جاں بحق ہوگیا۔
تفصیلات کے مطابق فیصل آباد کے حیدر آباد ٹاؤن کے رہائشی محنت کش لیاقت علی کا بیس سالہ بیٹا وقاص پیر کی رات محلہ عثمان غنی میں اپنے دوست یاسین کے بھائیوں کی مہندی کی تقریب میں شریک تھا کہ اچانک اندھا دھند فائرنگ شروع ہوگئی۔
فائرنگ کے دوران وقاص کی گردن میں گولی لگی جس کے بعد اُسے اہل خانہ اُسے الائیڈ اسپتال لے کر جارہے تھے کہ وہ جانبر نہ ہوسکا اور راستے میں ہی دم توڑ گیا۔
تھانہ غلام محمد آباد پولیس نے دلہے اور اُس کے بھائیوں کے خلاف مقدمہ درج کر کے شادی کے گھر سے 4 افراد کو گرفتار کیا تاہم مقتول وقاص کے والد لیاقت کی نشاندہی کے بعد چاروں کو رہا کردیا۔
تدفین کے بعد میڈیا سے گفتگو کرتے ہوئے مقتول کے والد لیاقت علی کا کہنا تھا کہ پولیس نے اپنی مرضی سے دلہا اور اُس کے بھائیوں کے خلاف مقدمہ درج کر کے انہیں گرفتار کرلیا۔ انہوں نے وزیراعلیٰ پنجاب سے مطالبہ کیا کہ وہ اس قتل کا نوٹس لیتے ہوئے اصل ملزمان کو گرفتار کر کے قرار واقعی سزا دلوائیں۔
مقتول کے والد کا کہنا ہے کہ اُن کے بیٹے کی دو ماہ بعد شادی تھی۔
