کراچی : خیابان نشاط میں 15 سال کے لڑکے نے 17 سال کے لڑکے کو قتل کردیا تاہم یہ واقعہ کیسے پیش آیا ، گرفتار کم عمر ملزم نے بتادیا۔
تفصیلات کے مطابق کراچی کے علاقے خیابان نشاط میں چھری لگنے سے نوجوان جاں بحق ہوگیا، پولیس نے بتایا کہ سترہ سال کا نوجوان اقرار مرغی اور سبزی فروخت کرتا تھا، اقرار دکان پر موجود کاریگر سے مذاق کررہا تھا کہ مذاق کے دوران کاریگرعمران سے اتفاقیہ چھری گلے پر لگ گئی۔
گزشتہ رات پیش آنیوالے واقعے پردرخشاں پولیس نے کم عمر ملزم عمران کوگرفتار کرلیا، گرفتار ملزم عمران نے بیان میں کہا کہ میں اے سی اور فریج کا کام کرتا ہوں، مقتول اقرار مرغی کی دکان پر ہوتا تھا،دونوں دکانیں ایک ہی مالک کی ہیں۔
ملزم کا کہنا تھا کہ مقتول اقرار دکان کے مالک کا بیٹاتھا، واش روم گیا تومنع کرنے کےباوجود اقرار بار بار آکر دروازہ کھول رہاتھا، واش روم سے باہر آکر تلخ کلامی ہوئی،اقرار نے مجھے 5،4تھپڑ مارے، جس کے بعد دکان سے چھری اٹھا کر پھینکی تو اقرار کوجالگی۔
