کراچی : پولیس فائرنگ سے زخمی ہونیوالے نوجوان ایان کے دوست نے واقعہ کی حقیقت بتادی اور کہا پولیس نے رکنے کے اشارے کو نظرانداز کرنے پر ایان کو گولی مار دی۔
تفصیلات کے مطابق کراچی کے علاقے خاموش کالونی میں پولیس فائرنگ سے نوجوان کے زخمی ہونے کے معاملے پر ایان کے دوست نے پورا واقعہ بیان کر دیا۔
متاثرہ دوست اویس نے بتایا ہے کہ ہم لالو کھیت کی طرف سے گولیمار چورنگی جا رہے تھے، انڈر پاس کی دوسری جانب پولیس موبائل کھڑی تھی، ایک پولیس اہلکار نے چلتی موٹر سائیکل پر میرا ہاتھ پکڑا جس سے میری بائیک سلپ ہو گئی۔
اویس کا کہنا تھا کہ میرے دوست عیان نے موبائل کو دیکھ کر موٹر سائیکل گھمائی اور واپس جانے لگا توپولیس اہلکاروں نے پیچھے سے عیان پر گولی چلا دی، عیان شدید زخمی ہو کر زمین پر پڑا رہا اور سادہ لباس اہلکار ویڈیو بناتے رہے۔
نوجوان نے مزید کہا کہ پولیس اہلکاروں نے ہماری ایک نا سنی، عیان لیاقت نیشنل اسپتال میں زیر علاج ہے۔
یاد رہے کراچی کے علاقے خاموش کالونی میں پولیس اہلکاروں کی فائرنگ سے 14 سالہ لڑکا شدید زخمی ہوگیا تھا ، ایان اپنےدوست کےساتھ لیاقت آباد سے ناظم آبادجارہاتھا، پولیس اہلکاروں نے موٹرسائیکل نہ روکنے پر فائرنگ کی۔