نوجوان لڑکے نے ہوٹل کے کمرے میں اپنی چار بہنوں اور ماں کو قتل کردیا، ملزم نے ویڈیو میں بتایا کہ پڑوسی اسکے گھروالوں کا ہراساں کررہے تھے۔
بھارتی شہر لکھنؤ بدھ کے روز ایک ہولناک واقعہ پیش آیا ہے جس میں 24 سالہ شخص ارشد نے مبینہ طور پر ایک ہوٹل میں اپنی ماں اور چار بہنوں کا قتل کر دیا، جرم کے بعد ریکارڈ کی گئی ایک ویڈیو میں، ارشد نے دعویٰ کیا کہ اس نے اپنے خاندان کو ’تحفظ‘ دینے کے لیے یہ کام کیا ہے۔
ارشد نے الزام لگایا کہ آگرہ میں ان کی جائیداد پر پڑوسیوں کی نظر تھی، نوجوان کا یہ بھی کہنا تھا کہ پڑوسیوں نے حیدرآباد میں اسکی بہنوں کو فروخت کرنے کا بھی منصوبہ بنایا تھا۔
ارشد نے مبینہ طور پر ویڈیو میں کہا کہ ہمارے پڑوسی ہماری جائیداد پر قبضہ کرنے کی کوشش کر رہے تھے اور انھوں نے حیدرآباد میں میری بہنوں کو فروخت کرنے کا منصوبہ بنایا، میں ایسا نہیں ہونے دے سکتا تھا۔
مذکورہ خاندان آگرہ کا رہنے والا ہے جو کہ 30 دسمبر سے ہوٹل میں مقیم تھا اور مبینہ طور پر نئے سال کا جشن منانے کے لیے اتر پردیش کے دارالحکومت میں موجود تھا۔
ارشد نے مبینہ طور پر اپنی ماں اور بہنوں کو نشہ آور اشیا سے بھرا کھانا اور شراب پیش کیا، اس کے گھنٹوں بعد اس نے مبینہ طور پر انھیں قتل کر دیا، کچھ کو گلا گھونٹ کر جبکہ کچھ کو اس نے بلیڈ کی مدد سے موت کے گھاٹ اتارا۔
مرنے والوں میں ارشد کی ماں اسما اور اس کی بہنیں شامل ہیں، جن کی عمریں صرف 9، 16، 18 اور 19 سال تھیں۔
ڈپٹی کمشنر پولیس روینہ تیاگی نے کہا کہ آج ہوٹل شرن جیت کے ایک کمرے سے پانچ لوگوں کی لاشیں ملی ہیں، مقامی پولیس نے موقع پر پہنچ کر ارشد نامی شخص کو حراست میں لیا گیا۔
روینہ تیاگی نے بتایا کہ ابتدائی پوچھ گچھ میں اس نے بتایا کہ خاندانی جھگڑے کی وجہ سے اس نے اپنی چار بہنوں اور ماں کو قتل کیا ہے۔ مزید پوچھ گچھ کی جا رہی ہے۔
