اسلام آباد: شالیمار کے علاقے میں فائرنگ کرکے نوجوان قتل کردیاگیا، پولیس نے بھائی کی مدعیت میں 5ملزمان کیخلاف مقدمہ درج کر لیا ہے۔
تفصیلات کے مطابق اسلام آباد میں تھانہ شالیمار کے علاقے میں فائرنگ سے نوجوان جاں بحق ہوگیا، پولیس نے بتایا کہ چھبیس سالہ نوجوان گزشتہ ایک ہفتے سے کاروباری دوستوں کے ہمراہ ایف الیون میں رہائش پذیر تھا اور مقتول نوجوان کی گاڑی ٹیمپرڈ ہونے پر کاروباری دوستوں کے ساتھ چپقلش بھی چل رہی تھی۔
حکام کا کہنا تھا کہ چھبیس سالہ نوجوان بلاور خان کوئٹہ سے اسلام آباد گاڑیوں کا کاروبار کرتا تھا، تلخ کلامی پر ملزمان نے فائرنگ کرتے ہوئے نوجوان کو قتل کر دیا۔
شالیمار پولیس نے مقتول کے بھائی کہ مدعیت میں پانچ نامزد سمیت نامعلوم ملزمان کیخلاف مقدمہ درج کر لیا ہے۔
پولیس نے مقتول کی لاش کو پوسٹ مارٹم کے بعد لواحقین کے حوالے کر دیا اور واقعہ کے حوالے سے کاروائی کرتے ہوئے ملزمان کی گرفتاری کا سلسلہ شروع کر دیا ہے۔
