The news is by your side.

جھاڑو پر اڑنے والا نوجوان ارب پتی بن گیا

یوں تو سوشل میڈیا آج کل لوگوں کی زندگی بدل کر انہیں راتوں رات مشہور کرسکتا ہے، ایسا ہی ایک نوجوان اپنی ایک ویڈیو کی بدولت ارب پتی بن گیا۔

زیک کنگ اپنی ویڈیو میں کبھی ہوائی جہاز غائب کرتے، کبھی کمرے کی چھت پر الٹے چلتے ہوئے اور کبھی اشیا کی اشکال بدلتے دکھائی دیتے ہیں، یہی وجہ ہے کہ ان کی ویڈیوز کروڑوں افراد دیکھتے ہیں اور ان کے فالوورز کی تعداد بھی دسیوں لاکھوں تک پہنچ چکی ہے۔

ان کی ایک ویڈیو دنیا بھر میں مقبول ہوئی جس میں وہ ہیری پوٹر کے کرداروں کا لباس پہنے ایک جھاڑو پر بیٹھے ہیں اور میدان میں چکر کاٹ رہے ہیں۔

اس میں دراصل انہوں نے ایک آپٹیکل الیوژن استعمال کرتے ہوئے ویڈیو ایڈیٹنگ کی ہے اور یوں لگتا ہے کہ واقعی وہ جھاڑو پر بیٹھ کر اڑ رہے ہیں۔

زندگی میں کئی مالی مشکلات کے شکار زیک اب ان ویڈیوز کی بدولت ارب پتی ہوچکے ہیں اور کیلی فورنیا کے ایک مہنگے ترین علاقے اگورا ہلز میں رہائش پذیر ہیں۔

انہوں نے 2019 دسمبر میں اڑنے والی جھاڑو کی ویڈیو پوسٹ کی تھی اور اب تک اس ویڈیو کو سوا 2 ارب افراد دیکھ چکے ہیں، حال ہی میں گنیز بک آف ورلڈ ریکارڈ نے اسے ٹک ٹاک پر سب سے زیادہ دیکھی جانے والی ویڈیو بھی قرار دیا ہے۔

اس ویڈیو کے متعلق زیک کنگ نے بتایا کہ انہوں نے ہیلووین کے لیے ایک دوپہر کو یہ ویڈیو بنائی گئی تھی، اس میں آئینے استعمال کیے گئے تھے تاکہ وہ سامنے کا عکس دکھا سکیں۔

پھر کچھ ایڈیٹنگ کر کے اسے حقیقت کےقریب دکھایا گیا تھا۔

Comments

یہ بھی پڑھیں