قومی ٹیم کے سابق لیجنڈری بیٹر ظہیر عباس نے بابر اعظم کو خراب فارم کی وجہ سے ٹیم سے ڈراپ کرنے کا مطالبہ کردیا۔
ایشین بریڈ مین ظہیر عباس نے غیرملکی میڈیا سے گفتگو کرتے ہوئے کہا کہ ویرات کوہلی اور بابر اعظم کا موازنہ کرنا فضول کی باتیں ہیں، اسکور کرنے والا بڑا کھلاڑی ہوتا ہے۔
انہوں نے کہا کہ بابر اعظم کو ٹیم سے ڈراپ کیا جانا چاہیے اگر وہ رنز نہیں بنارہا ہے، وہ ہمارا اہم بلے باز ہے اور وہ آؤٹ آف فارم ہے تو اسے ٹیم سے باہر ہونا چاہیے۔
ظہیر عباس نے کہا کہ پاکستان کی کرکٹ اس وقت ڈاما ڈول ہے، بورڈ کو معلوم ہوگیا ہے کہ ٹیسٹ کرکٹ کے بغیر گزارا نہیں، پلیئرز میں اختلاف ہوتے ہیں لیکن ٹیم کو نقصان نہیں ہونا چاہیے۔
واضح رہے کہ بابر اعظم کو حالیہ کارکردگی کی وجہ سے سخت تنقید کا سامنا کرنا پڑرہا ہے، بنگلا دیش کیخلاف دو ٹیسٹ میچز کی سیریز میں بھی ان کی کارکردگی مایوس کن رہی تھی۔
بابر اعظم آئی سی سی ٹیسٹ رینکنگ میں ٹاپ ٹین کی فہرست سے بھی باہر ہوگئے جبکہ بنگلادیش کیخلاف سیریز میں وہ چار اننگز میں صرف 64 رنز بناسکے تھے۔
یاد رہے کہ بابر اعظم نے آخری بار دسمبر 2022 میں نیوزی لینڈ کیخلاف 161 رنز کی اننگز کھیلی تھی جبکہ جولائی 2023 میں سری لنکا کیخلاف بابر نے 39 رنز اسکور کیے تھے۔
