The news is by your side.

Advertisement

ملکی تاریخ میں پہلی بار کسی وزارت کا خرچ صفر ہوگیا

وفاقی وزیر مواصلات مراد سعید نے 11 ماہ میں قومی خزانے سے کوئی رقم استعمال نہیں کی

اسلام آباد: ملکی تاریخ میں پہلی بار کسی وزارت کا اب تک کا خرچ صفر ہوگیا، وفاقی وزیر مواصلات مراد سعید نے گزشتہ 11 ماہ میں قومی خزانے سے کوئی رقم استعمال نہیں کی۔

تفصیلات کے مطابق وزیر اعظم کی ہدایت پر وزارتوں کے اخراجات میں کمی کے احکامات پر بھرپور عملدر آمد کیا جارہا ہے، ملکی تاریخ میں پہلی بار کسی وزارت کا اب تک کا خرچ صفر تک آگیا۔

وفاقی حکومت نے وزارت مواصلات کی 11 ماہ کی کارکردگی پر رپورٹ جاری کی ہے، رپورٹ کے مطابق وزارت مواصلات کی آمدن میں 51 فیصد سے زائد ریکارڈ اضافہ دیکھا گیا۔ صرف 11 ماہ میں وزارت کا ریونیو 43 ارب روپے سے تجاوز کر گیا۔

رپورٹ میں کہا گیا کہ سابقہ دور میں وزیر اور پارلیمانی سیکریٹری نے لاکھوں روپے محض بطور ٹی اے ڈی اے وصول کیے۔ سابق پارلیمانی سیکریٹری نے 48 لاکھ 52 ہزار اور وزیر نے 35 لاکھ 91 ہزار روپے خرچ کیے۔

رپورٹ میں کہا گیا کہ سابق دور میں صرف گاڑی اور پیٹرول کا خرچ ایک کروڑ 20 لاکھ سے زائد تھا۔ وفاقی وزیر مواصلات مراد سعید نے اب تک قومی خزانے سے کوئی رقم استعمال نہیں کی۔

رپورٹ کے مطابق 11 ماہ میں 7 ارب کی رقم ریکور کر کے قومی خزانے میں جمع کروا دی گئی۔ اس کے برعکس سابق دور حکومت میں ریکوری کی مد میں کوئی رقم جمع نہیں کی گئی۔ موجودہ حکومت میں انسداد تجاوزات مہم کے ذریعے اربوں روپے ریکور کیے گئے۔

رپورٹ میں مزید کہا گیا کہ وزارت مواصلات کے منصوبوں میں شفافیت کے لیے بھی جدید نظام متعارف کروایا گیا۔ ای بلنگ، ای ٹینڈرنگ اور موبائل ایپ جیسی سہولتوں سے شفافیت کو بڑھایا گیا۔ پہلے سے شروع کیے گئے قومی شاہراہوں کے مختلف منصوبے بھی 3 سے 6 ماہ میں مکمل ہوجائیں گے۔

Comments

یہ بھی پڑھیں