اسلام آباد: بلوچستان کے علاقے ژوب میں ٹی ٹی پی حملے میں امریکی فوج کا چھوڑا ہوا اسلحہ استعمال کیے جانے کا انکشاف ہوا ہے۔
تفصیلات کے مطابق بلوچستان کے علاقے ژوب میں ہلاک کیے جانے والے دہشت گردوں سے متعلق بڑی خبر سامنے آ گئی ہے، تحریک طالبان پاکستان (ٹی ٹی پی) کے ژوب حملے میں دہشت گردوں کی جانب سے امریکی ہتھیار اور سامان کا استعمال کیا گیا تھا۔
ذرائع کا کہنا ہے کہ دہشت گردوں نے افغانستان میں امریکی فوج کا چھوڑا ہوا اسلحہ استعمال کیا، اسلحے میں 5.56 ایم ایم کیلیبر ایم 16 اسالٹ رائفلیں، جدید معیار کے ہیلمٹ استعمال کیے گئے تھے، دہشت گردوں نے امریکی دستانے، بیک پیک اور یونیفارم بھی پاکستان کے خلاف استعمال کیا۔
تصاویر میں دیکھا جا سکتا ہے کہ ہلاک حملہ آور دہشت گرد امریکی یونیفارم میں ملبوس ہیں، اس سنسنی خیز انکشاف کے بعد یہ بڑا سوال اٹھا ہے کہ جدید امریکی اسلحہ اور یونیفارم دہشت گردوں تک کیسے پہنچے؟ یقیناً یہ وہی اسلحہ و امریکی فوجی یونیفارم ہے جو ٹی ٹی پی کے بزدل شر پسند پاکستان کے خلاف استعمال کرتے آئے ہیں۔
ذرائع نے دہشت گردوں کو متنبہ کیا ہے کہ بھاری ہتھیاروں سے لیس دہشت گرد امریکی یونیفارم بھی پہن لیں تب بھی وہ اپنے مذموم عزائم میں کامیاب نہیں ہو پائیں گے، اور سیکیورٹی فورسز دہشت گردوں کے مکمل خاتمے تک یہ جنگ جاری رکھیں گی۔
