کراچی: اورنگی میں ایم کیو ایم کی رکنیت سازی کیمپ پر کریکر حملے کا ایک زخمی اسپتال میں دم توڑ گیا، ایم کیو ایم نے حملے کی ذمہ داری قبول کرنے والی کالعدم تنظیموں کے خلاف کارروائی کا مطالبہ کردیا ہے۔
کراچی کےعلاقے اورنگی میں ایم کیو ایم کی رکنیت سازی کیمپ پر کریکرحملے کا ایک زخمی دوران علاج اسپتال میں چل بسا، گزشتہ روز حملے میں عبدالجبار سمیت انتیس افراد زخمی ہوئے تھے، جن میں تین اراکین سندھ اسمبلی بھی شامل ہیں۔
ایم کیوایم لندن رابطہ کمیٹی نے وفاقی وصوبائی حکومت سے مطالبہ کیا ہے کہ اورنگی ٹاؤن میں ایم کیوایم کے رکنیت سازی مہم کے کیمپ پر بم سے حملہ کی ذمہ داری قبول کرنے والی جماعت الا حرار او رجنداللہ کے خلاف سخت کارروائی کی جائے۔
بیان میں کہا گیا ہے کہ جماعت الا حرار گروپ ، جند اللہ اور لشکر جھنگوی اس سے قبل بھی ایم کیوایم کے ارکان اور دفاتر کو نشانہ بنا چکے ہیں، جس میں کارکنوں سمیت بڑی تعدادمیں شہری بھی جاں بحق ہوئے دہشت گردوں کے خلاف سخت کارروائی کرکے ان کا قلع قمع کیا جائے۔