بحرالکاہل: روس کا بحری جہاز بحرالکاہل میں ڈوب گیا، جس کے نتیجے میں چون افراد ہلاک جبکہ متعدد لاپتہ ہوگئے۔
روسی میڈیا کے مطابق یہ حادثہ روس کے مشرق میں 330 کلومیٹر کے فاصلے پر واقع جزیرہ نما کمچاتکا کے قریب پیش آیا۔
بدقسمت دالنی ووستوک نامی فشنگ ٹرالر میں ایک سو بتیس افراد سوار تھے، جن میں تریسٹھ افراد کو بچالیا گیا ہے جبکہ سولہ اب بھی لاپتہ ہیں۔ ٹرالر میں سوار اٹھہترافراد کا تعلق روس جبکہ چون کا دیگرممالک سے ہے، جن میں لیٹویا، یوکرین، برما اور ونواتو بھی شامل ہیں۔
بحرالکاہل میں روسی نیوی اور میری ٹایم سکیورٹی کی جانب سے ریسکیو آپریشن جاری ہے، ریسکیو آپریشن میں آٹھ سو اہلکار ہیلی کاپٹر اور دو درجن کشتیاں حصہ لے رہی ہیں۔
تاحال حادثے کی وجہ واضح نہیں ہو سکی ہے تاہم روس میں ہنگامی امداد کے اداروں کا کہنا ہے کہ سمندر میں تیرتے برفانی ٹکڑوں نے ممکنہ طور پر جہاز میں سوراخ کیا جس سے وہ ڈوب گیا۔
روسی وزارت کا کہنا ہے کہ پانی جہاز کے انجن روم میں بھرا اور ٹرالر 15 منٹ میں ہی ڈوب گیا۔
