ترکی: صدارتی انتخاب میں رجب طیب اردگان بھاری اکثریت سے جیت گئے، جس پر ترکی میں لاکھوں افراد جشن مناتے ہوئے سڑکوں پر نکل آئے، وزیر اعظم نواز شریف نے رجب طیب اردگان کو کامیابی پر مبارکباد پیش کی ہے ۔
ترکی کی اکیانوے سالہ تاریخ میں پہلی بار عوام نے براہ راہ ست اپنے صدر کا انتخاب کیا، ترکی کے صدارتی انتخابات میں موجودہ وزیراعظم طیب اردگان نے نصف سے زائد ووٹ حاصل کرلیے، جس کے بعد ان کے ترکی کا صدر بننے کی راہیں صاف ہوگئی ہیں۔
انقرہ میں وزیراعظم کے مشیرحسین سلیک نے پریس کانفرنس کرتے ہوئے کہا کہ طیب اردگان نے باون فیصد سے زائد ووٹ حاصل کیے، طیب اردگان کے فتح کے اعلان کے ساتھ ہی ترکی کے مختلف شہروں میں ان کی حامیوں کی بڑی تعداد جشن مناتے ہوئے سڑکوں پر نکل آئی۔
صدارتی انتخابات میں ان کے حریف اکمل الدین احسان اگلو نے اڑتیس فیصد اور کرد سیاستدان صلاح الدین دمیرتاس نے دس فیصد ووٹ حاصل کیے، صدارتی انتخابات میں واضح برتری حاصل کرنے بعد اردگان نے اپنی جیت کو جمہوریت کی فتح قرار دیا۔
