لاہور:تیز رفتار اسکول وین گندے نالے میں گرنے سے تین بچے جاں بحق ہوگئے ۔وزیراعلیٰ شہباز شریف نے نوٹس لیتے ہوئے انکوائری کا حکم دے دیا۔
تفصیلات کے مطابق لاہور میں تیزرفتاراسکول وین چھٹی کے بعد بچوں کو گھر چھوڑنے جارہی تھی کہ کاہنہ کے قریب نالے میں جاگری ۔حادثے میں تین بچے انیس ،ہاشم اور قاسم جاں بحق جبکہ چار طالب علم زخمی ہوئے ۔ والد مشتاق احمد کا کہنا ہے کہ خستہ حال وین کا گزشتہ روز بھی حادثہ ہوا تھا، مگر کوئی سنوائی نہیں ہوئی۔
ڈی سی اولاہور کا کہنا ہے کہ حادثہ تیز رفتاری کے باعث پیش آیا،ڈرائیوراورکنڈیکٹر کی تلاش جاری ہے، پولیس افسر نے میڈیا سے گفتگو میں بتایا کہ شاہین ماڈل اسکول کے پرنسپل خالد جمیل کو مزید تفتیش کیلئےگرفتار کر لیا گیا ہے، عینی شاہد کا کہناتھا کہ سو سے زائد بچوں کواپنی مدد آپ کے تحت نالے سے نکالا گیا۔
وزیراعلیٰ پنجاب شہباز شریف نے واقعے پر اظہار افسوس کرتے ہوئے واقعہ کی تحقیقات کا حکم دے دیا ہے،جبکہ اس موقع پر مظاہرین نے تنگ سڑک کی تعمیر نہ ہونے پرنو نواز گو کےنعرے بھی لگائے۔
بچوں کے والدین کا کہنا ہے کہ ڈرائیور ایک آنکھ سے محروم اور نشے کا عادی ہے، کئی بار پرنسپل کو شکایت کی لیکن نوٹس نہیں لیا گیا۔ ڈی سی او لاہور کا کہنا ہے کہ واقعہ کی تحقیقات شروع کر دی گئی ہیں۔
4 زخمیوں کو ہسپتال میں علاج کی مناسب سہولتیں دی جا رہی ہیں جبکہ معمولی زخمیوں کو ابتدائی طبی امداد دے کر فارغ کر دیا گیاہے۔ واقعہ کے بعد بس ڈرائیور اور کنڈیکٹر جائے وقوعہ سے فرار ہو نے میں کامیاب ہوگئے۔
جبکہ پولیس نے اسکول پرنسپل کو حراست میں لے کر قانونی کارروائی کا آغاز کردیا ہے۔
