راولپنڈی کے آر اے بازار کے قریب فوج اور پولیس کی مشترکہ چوکی پر خود کش حملے میں اب تک تیرہ افراد جاں بحق اور پچیس سے زائد زخمی ہو گئے، خود کش حملہ آور نے سیکورٹی اہلکاروں کے روکنے پر خود کو دھماکے سے اُڑالیا۔
صبح کے پونے آٹھ بجے آر اے بازار میں خود کش حملہ آور نے پولیس اور فوج کی مشترکہ چوکی کے قریب روکے جانے پر خود کو دھماکے سے اڑا لیا، دھماکہ اس قدر شدید تھا کہ قریبی عمارتیں لرز اٹھیں اور کھڑکیوں کے شیشے ٹوٹ گئے، قریب میں کھڑی متعدد گاڑیاں تباہ ہو گئیں۔
دھماکا اے ایف آئی سی سے چھ سو میٹر دوری پر ہوا، جہاں سابق صدر پرویز مشرف زیر علاج ہیں، دھماکے کے بعد سیکورٹی فورسز نے علاقے کو گھیرے میں لے کر امدادی کاروائیاں شروع کر دیں، زخمیوں میں اسکول جانے والے چار بچے بھی شامل ہیں، دھماکے میں جاں بحق ہونے والے چار افراد کی لاشیں اور چار زخمیوں کو ضلع ہیڈ کوارٹر اسپتال پہنچا دیا گیا، تفتیشی اہلکاروں کو مبینہ خود کش حملہ آور کی ایک ٹانگ مل گئی ہے۔
