حیدرآباد : سینئر صوبائی وزیر نثار کھوڑو نے کہا ہے کہ سندھ میں 20 ستمبر کو بلدیاتی انتخابات کرائے جائیں گے، کوشش کریں گے کہ خیبرپختونخواہ کی مثال سندھ میں نہ دہرائی جائے۔
حیدرآباد میں پریس کانفرنس سے خطاب کرتے ہوئے نثار کھوڑو کا کہنا تھا کہ سندھ میں بلدیاتی قانون ایسا بنایا ہے کہ کسی بھی جماعت نے اسے عدالت میں چیلنج نہیں کیا۔
انہوں نے کہا کہ صوبے میں ہونے والے بلدیاتی انتخابات پہلی مرتبہ جماعتی بنیادوں پر ہوں گے، نثار کھوڑو کا کہنا تھا کہ کوشش کریں گے کہ سندھ میں بلدیاتی انتخابات کے دوران خیبرپختونخواہ جیسے حالات رونما نہ ہوں۔
انقلاب کی بات کرنے والوں کے صوبے میں بلدیاتی انتخابات میں 8 سے 10 اموات ہوئیں اور تبدیلی کی بات کرنے والوں نے ووٹ کے تقدس کو پامال کیا۔
نثار کھوڑو کا کہنا تھا کہ اگر عمران خان دوبارہ بلدیاتی الیکشن کرانے کے لئے تیار ہیں تو پھر یہ مطالبہ بھی آسکتا ہے کہ ان کی صوبائی حکومت پر کسی کو اعتبار نہیں۔
انہوں نے کہا کہ کے پی کے کے وزیر اعلیٰ نے اعتراف کیا ہے کہ جس کا جہاں زور چلا اُس نے دھاندلی کی، انہوں نے کہا کہ عام انتخابات میں پہلے دو مراحل میں انتخابات ہوتے تھے جس کے خلاف پیپلزپارٹی نے تحریک چلائی، جب ملک میں عام انتخابات ایک دن ہوسکتے ہیں تو ایک صوبے میں بلدیاتی الیکشن ایک دن میں کیوں نہیں ہوسکتے۔
سندھ میں بلدیاتی انتخابات مختلف مراحل میں کرانے کی کوئی تجویز زیر غور نہیں ہے، انہوں نے کہا کہ ملک میں 98 کے بعد مردم شماری نہیں پتہ ہی نہیں ہے کہ شہروں‘ دیہاتوں‘ صوبوں اور ملک میں کتنی آبادی ہے۔
انہوں نے کہا کہ ہم سب کا مطالبہ تھا کہ بلاول بھٹو پاکستان آکر یہاں کی سیاست میں حصہ لیں، انہوں نے کہا کہ گورنر سندھ فی الحال اپنے عہدے پر موجود ہیں، گورنر کا استعفیٰ ان کا ذاتی اور وفاق کا معاملہ ہے۔
