یمن: حوثی باغیوں کیخلاف کارروائیاں ستروِیں روز میں داخل ہوگئی ہیں، اتحادی افواج نے دارالحکومت صنعا میں باغیوں کے زیرِقبضہ فوجی اڈے کونشانہ بنایا۔ ملک کے شمالی صوبے میں بمباری سے خاتون سمیت چارافراد ہلاک ہوگئے۔
یمن میں سعودی عرب کی زیرِقیادت اتحادی فوجوں کی کارروائیاں سترہویں روز بھی جاری ہیں، تازہ حملوں میں دارالحکومت صنعا سمیت ملک کے شمالی حصوں میں باغیوں کے ٹھکانوں کونشانہ بنایا گیا۔
عدن میں حوثی باغیوں کے زیرِ قبضہ اسٹیڈیم پر اتحادی افواج نے بمباری کی، جہاں اسلحہ چھپایا گیا تھا، ریڈکراس نے عدن کے بعد صنعا میں امدادی سامان اور دوائیں پہنچائیں۔
اقوام متحدہ نے فضائی حملوں اور زمینی لڑائی میں روزانہ کی بنیاد پر چند گھنٹوں کا وقفہ دینے کی اپیل کی ہے تاکہ متاثرہ علاقوں میں امدادی سامان پہنچایا جاسکے۔
سعودی فوج کے ترجمان کا کہنا ہے اتحادی طیاروں نے یمن کے مختلف علاقوں میں باغیوں کی قائم کردہ چیک پوسٹس اور دیگرٹھکانوں کونشانہ بنایا۔ یمن کے بحران میں اب تک خواتین اوربچوں سمیت چھ سوسے زائد افرادہلاک اورایک لاکھ بے گھرہوچکے ہیں، مختلف علاقوں میں کھانے پینے کی اشیاء شدید قلت پیدا ہوگئی ہے۔
