میلبورن : بھارتی ٹیم کے کپتان مہیندرا سنگھ دھونی نے ٹیسٹ کرکٹ سے ریٹائرمنٹ کا اعلان کردیا۔مہیندر سنگھ دھونی کی ٹیسٹ کرکٹ کا سورج غروب ہوگیا۔
تفصیلات کے مطابق آسٹریلیا سے ٹیسٹ سیریز میں شکست پر بھارتی ٹیم کے کپتان مہیندرا سنگھ دھونی کافی دباؤ میں ہیں، میلبورن میں پریس کانفرنس کے دوران دھونی نے ٹیسٹ کرکٹ کو الوداع کہہ دیا۔
دھونی نے ساٹھ ٹیسٹ میچز میں بھارتی ٹیم کی قیادت کی۔ انہیں بھارتی ٹیم کے کامیاب ترین کپتانوں میں شمار کیا جاتا ہے۔ دھونی نے دوہزار پانچ میں سری لنکا کے خلاف چنائی میں ٹیسٹ کیرئیر کا آغاز کیا اور نوے میچز میں بھارت کی نمائندگی کی۔
دھونی نے طویل دورانیئے کی کرکٹ میں چھ سینچریز اور تینتیس نصف سینچریز کی مدد سے چار ہزار آٹھ سو چہتر رنز اسکور کئے۔دھونی نے تن تنہا ہی بھارتی ٹیم کو کئی کامیابیاں دلائیں۔
دوہزار آٹھ میں انہیں ٹیسٹ ٹیم کی قیادت سونپی گئی۔ انہی کی قیادت میں بھارتی ٹیم پہلی مرتبہ ٹیسٹ کی نمبر ون ٹیم بنی۔ صرف اتنا ہی نہیں چالیس سال میں پہلی مرتبہ بھارت نے آسٹریلیا کو دھونی ہی کی قیادت میں کلین سوئپ بھی کیا۔
دھونی کا کہنا ہے کہ ٹیسٹ کرکٹ چھوڑنے کا فیصلہ بہت سوچ سمجھ کر کیا ہے۔ وہ تمام تر توجہ ون ڈے اور ٹی ٹوئنٹی کرکٹ پر مرکوز رکھنا چاہتے ہیں۔آسٹریلیا کے خلاف سڈنی ٹیسٹ میں ویرات کوہلی ٹیم کی قیادت کریں گے۔
