نیویارک: کروشیا کے مارن سلچ نے جاپان کے کی نیشکوری کو شکست دے کر کیرئیر کا پہلا گرینڈ سلم یو ایس اوپن ٹینس ٹورنامنٹ جیت لیا۔ نیویارک کے آرتھر ایش اسٹیڈیم میں کھیلا جانے والا فائنل یکطرفہ رہا۔
فورٹینتھ سیڈ کروشیا کے مارن سلچ کی برق رفتار سروس کا جاپانی کھلاڑی کے پاس کوئی توڑ نہ تھا۔سلچ نے کھیل کے آغاز سے ہی حریف کھلاڑی کی ایک نہ چلنے دی۔ اور ٹائٹل معرکے میں اسٹریٹ سیٹس میں کامیابی حاصل کرلی۔
سلچ کی فتح کا اسکور چھ تین، چھ تین اور چھ تین رہا۔ کی نیشکوری کا گرینڈ سلم جیتنے والے ایشیا کے پہلے کھلاڑی بننے کا خواب شرمندہ تعبیر نہ ہوسکا۔
سلچ نے دو گھنٹے سے بھی کم وقت میں جاپانی کھلاڑی کو زیر کرڈالا۔ سلچ دوہزار ایک کے بعد کوئی بھی گرینڈ سلم جیتنے والے پہلے کروشین کھلاڑی ہیں
