بالی ووڈ کے معروف اداکار شاہ رخ خان کو طبیعت ناساز ہونے پر اسپتال منتقل کردیا گیا۔
بھارتی میڈیا رپورٹس کے مطابق آئی پی ایل 2024 کے پلے آف مرحلے میں کولکتہ نائٹ رائیڈرز نے سن رائزرز حیدرآباد کے خلاف تاریخی فتح حاصل کی، اس دوران شاہ رخ خان اپنی ٹیم کو سپورٹ کرنے کے لیے اسٹیڈیم میں موجود تھے۔
تاہم آج شاہ رخ خان کو طبیعت ناساز ہونے پر احمد آباد کے ’کے ڈی‘ اسپتال منتقل کیا گیا ہے۔
کنگ خان کی طبیعت خرابی کی وجہ فی الحال واضح نہیں ہے تاہم کچھ رپورٹس میں کہا گیا ہے کہ ان کی طبیعت ہیٹ اسٹروک اور جسم میں پانی کی کمی کی وجہ سے خراب ہوئی ہے۔
میڈیا رپورٹس کے مطابق شاہ رخ خان کی طبیعت اب بہتر ہے اور انہیں اسپتال سے ڈسچارج کردیا گیا ہے۔
واضح رہے کہ 20 مئی کو شاہ رخ خان، اہلیہ گوری خان، بچوں سہانا اور آریان کے ساتھ ووٹ کاسٹ کرنے ممبئی کے پولنگ بوتھ پہنچے تھے اور تصاویر بھی بنوائی تھیں۔
