کولکتہ نائٹ رائیڈرز کے شریک مالک شاہ رخ خان نے گوتم گمبھیر کو اپنی فرنچائز کے ساتھ منسلک رہنے کے لیے بلینک چیک کی پیشکش کی تھی۔
رپورٹس میں دعویٰ کیا گیا ہے کہ آئی پی ایل 2024 میں کولکتہ نائٹ رائیڈرز کے مینٹور گمبھیر کو فرنچائز کے شریک مالک شاہ رخ نے اگلے 10 سالوں کے لیے اپنی ٹیم کے ساتھ منسلک رہنے کے حوالے سے ’بلینک چیک‘ پیش کیا تھا جب وہ لکھنؤ سپر جائنٹس کے کوچ تھے۔
آئی پی ایل ٹائٹل جیتنے کے بعد گمبھیر بھارت کا اگلا ہیڈ کوچ بننے کے مضبوط امیدوار ہیں اور انھیں اس میں دلچسپی بھی ہے۔ تاہم کے کے آر چھوڑنے پر شاہ رخ کے ساتھ ان کی کیا بات چیت ہوگی یا کنگ خان انھیں روکنا چاہیں گے تو گوتم کیا شرائط پیش کرتے ہیں یہ آئندہ کچھ دنوں میں سامنے آئے گا۔
اس وقت گمبھیر بھارتی ہیڈ کوچ کی نوکری میں بھی دلچسپی رکھتے ہیں لیکن اگر وہ اس پوسٹ کے لیے درخواست دیتے ہیں تو انھیں اپنے انتخاب کی سو فیصد ضمانت چاہیے۔
اگر بی سی سی آئی گمبھیر کو صرف ’امیدواروں‘ میں سے ایک کے طور پر دیکھ رہا ہے، تو پھر کولکتہ نائٹ رائیڈرز کے کوچ درخواست نہیں دیں گے۔
رکی پونٹنگ، جسٹن لینگر اور اسٹیفن فلیمنگ جیسے پلیئرز راہول ڈریوڈ کی جگہ ہیڈ کوچ بننے کے لیے بی سی سی آئی کو پہلے ہی انکار کرچکے ہیں۔
واضح رہے کہ کرکٹ کی معروف ویب سائٹ کرک انفو نے بتایا ہے کہ بورڈ آف کنٹرول فار کرکٹ ان انڈیا نے سابق اوپنر سے رابطہ کیا ہے کیونکہ وہ سبکدوش ہونے والے ہیڈ کوچ راہول ڈریوڈ کا متبادل تلاش کرنے کے لیے سرگرداں ہیں۔
بھارتی بورڈ نے مبینہ طور پر ہیڈ کوچ کے عہدے کے لیے اسٹیفن فلیمنگ سے بھی رابطہ کیا تھا لیکن چونکہ یہ میعاد 2027 ورلڈ کپ تک ہوگی اس لیے نیوزی لینڈ کے سابق کپتان اس کے تیار نظر نہ آئے۔
گوتم اس وقت کولکتہ نائٹ رائیڈرز کے مینٹور کے طور پر خدمات انجام دے رہے ہیں، کوچنگ کا کوئی خاص تجربہ نہ ہونے کے باوجود انھوں نے کے کے آر اور لکھنؤ سپر جائنٹس کے ساتھ کامیاب کوچ کی حیثیت سے خود کو منوایا ہے۔
