اسلام آباد : چیئرمین نادرا نے تحریک انصاف کی جانب سے لکھے گئے خط کے جواب میں کہا ہے کہ پی ٹی آئی کو ووٹرز کے انگوٹھوں کے نشان کی تصدیق شدہ رپورٹ فراہم کرنے پر کوئی اعتراض نہیں، تاہم اس کے پاس یہ اختیار نہیں۔
چیئرمین نادرا عثمان ندیم نے تحریک انصاف کے رہنما جہانگیر ترین کی جانب سے لکھے گئے خط کے جواب میں کہا کہ نادرا 37 انتخابی حلقوں میں ووٹرز کی انگوٹھوں کے ذریعے تصدیق کی رپورٹ فراہم نہیں کرسکتا.
کیونکہ اس کا اختیار صرف متعلقہ الیکشن ٹریبونلز کے پاس ہے، اگر تحریک انصاف کو ووٹرز کی تصدیق شدہ رپورٹ چاہئیے تو وہ الیکشن ٹریبونلز یا ان کے مقرر کردہ نمائندوں سے رابطہ کرے۔
اس سے قبل جہانگیر ترین نے چیئرمین نادرا کو ایک خط تحریر کیا تھا جس میں درخواست کی گئی تھی کہ پندرہ اپریل سے قبل 37 حلقوں کے ووٹرز کی انگوٹھوں کے ذریعے شناخت کی رپورٹ پارٹی کو فراہم کی جائے تاکہ یہ جوڈیشل کمیشن کے سامنے پیش کی جاسکے۔
