پشاور : پاک فوج کے سربراہ جنرل راحیل شریف نے کور ہیڈ کوراٹر پشاور کا دورہ کیا۔
تفصیلات کے مطابق آرمی چیف جنرل راحیل شریف نے آرمی پبلک اسکول پشاور کے شہداء کے لواحقین کے اعزاز میں دئیے گئے افطار ڈنر میں اپنی اہلیہ کے ہمراہ شرکت کی اور ہر شہید کے خاندان سے فرداً فرداً ملاقات کر کے اظہار یکجہتی کیا ۔
بعد ازاں اسکول اسٹاف کے لواحقین سے گفتگو میں آرمی چیف کا کہنا تھا کہ سولہ دسمبر کے سانحے کے زخم مندمل نہیں ہو سکتے ۔
پوری قوم مادر وطن کے دفاع کے لئے جانیں قربان کر نے والوں کے ساتھ کھڑی ہیں ۔ انہوں نے کہا کہ کمسن شہداء نے اپنی جانوں کے نذرانے دے کر قوم کو متحد کیا ۔
ان معصوم بچوں کے خون سے ہولی کھیلنے والوں کا کوئی مذہب نہیں ہے ان دہشت گردوں کو کیفر کردار تک پیہنچایا جائے گا اور پاک سرزمین سے آخری دہشت گرد کے خاتمے تک پاک فوج کا آپریشن جاری رہے گا۔
اس موقع پر سانحہ کے شہدا ء کیلئے خصوصی فاتحہ خوانی کی گئی۔ کور کمانڈر پشاور لیفٹینیٹ جنرل ہدایت الرحمن بھی اس موقع پر موجود تھے۔