اسلام آباد: پاکستان تحریک انصاف کے سربراہ عمران خان نے میڈیا سے گفتگو کرتے ہوئے کہا ہے کہ خوف کی فضا کو ختم کرنے کراچی جارہاہوں۔
تحریک انصاف کے سربراہ اپنی رہائش گاہ بنی گالہ سے حیدرآباد کے لئے روانہ ہوتے وقت میڈیا سے گفتگو کررہے تھے اور ان کا کہنا تھا کہ حیدرآباد میں میٹنگ میں شرکت کرکے آج رات کراچی پہنچوں گا کل کا سارا دن حلقہ این اے246 میں گزاروں گا۔
انہوں نے کہا کہ کراچی میں خوف کی فضا ہے جو کہ ووٹر اور امیدوار کو ڈراتی ہے اسی فضا کو ختم کرنے جارہا ہوں انتخابی سرگرمی میرا حق ہے۔
عمران خان نے یہ بھی کہا کہ ’’سنا ہے میرے استقبال کے لئے انڈے اور ٹماٹر جمع کرلیے گئے ہیں‘‘۔
ایک سوال کے جواب میں انہوں نے کہا کہ انتخابی مہم ہمارا حق ہے اگر ہمارا ایک بھی کارکن زخمی ہوا تو لندن میں الطاف حسین کے خلاف برطانوی قانون کےتحت مقدمہ درج کرائیں گے۔
ان کا کہنا تھا کہ اگرخطروں کا سامنا نہیں کیا تو کراچی میں نوگو ایریا بنے رہیں گے لہذا ان کا کراچی جانا ضروری ہے۔
انہوں نے یہ بھی کہا کہ این اے 246 میں جماعت اسلامی سے انتخابی مفاہمت پر بات چل رہی ہے امید ہے کہ بات بن جائے۔
جوڈیشل کمیشن سے متعلق پوچھے گئے سوال پر ان کا کہنا تھا کہ قانون حکومت بناتی ہے اگر جوڈیشل کمیشن نہیں بنتا تو دھاندلی کی تحقیقات کیسے ہوتیں اور یہ کیسے طے ہوتا کہ آئندہ الیکشن میں دھاندلی نہیں ہوگی۔
انہوں ایک بار پھر اپنا موقف دہرایا کہ موجودہ اسمبلیاں آئین کے مطابق جعلی ہیں کیونکہ آئین کہتا ہے کہ انتخابات شفاف نہ ہوں تو اسمبلیاں حقیقی نہیں ہوتیں۔
یمن کے مسئلے پر عمران خان کا کہنا تھا وہاں خانہ جنگی ہے لہذا پاکستان کواس معاملے سے دور رہنا چاہیئے ہم پہلے ہی امریکہ کی جنگ کے نقصانات بھگت رہے ہیں، وہاں کا معاملہ فرقہ وارانہ رنگ اختیار کرے گا اور پاکستان کو پہلے ہی فرقہ واریت سے کافی نقصان پہنچ چکا ہے۔
