اردن: اردن سے تعلق رکھنے والا پائلٹ جہاز کی ایمرجنسی لینڈنگ کے نتیجے میں داعش کے دہشت گردوں کے قبضے میں چلاگیا، شام کے شمال مشرقی علاقے میں امریکہ اور اسکے اتحادیوں کے جنگ میں شامل ہونے کے بعد یہ پہلا جنگی قیدی ہے۔ا
اردن کی فضائیہ نے تصدیق کی ہے کہ صوبہ رقاء پر کئے گئے حملے میں یہ پائلٹ قیدی بنا ہے لیکن اس بات کی تاحال تصدیق نہیں ہوئی کہ آیا پائلٹ کے طیارے کو نشانہ بنایا گیا تھا یا پھرکسی اور وجہ کی بنا پرپائلٹ نے ایمرجنسی لینڈنگ کی۔
اردن نے سرکاری ٹی وی پر جاری کردہ بیان میں کہا ہے کہ دولت اسلامیہ اور اسکے حامی ان کے پائلٹ کی زندگی کے ذمے دار ہیں ۔
سرکاری ترجمان محمد المومانی کے مطابق ایف 16 طیارے کوزمین سے میزائلوں کے ذریعے نشانہ بنایا گیا ہے لیکن بعد ازاں ایک اوربیان میں ابتدائی بیان کی تردید کرتے ہوئے انہوں نے کہاکہ جہاز کو نشانہ بنانے کے شواہد نہیں ملے ہیں اور فی الحال کوئی حتمی بات نہیں کی جاسکتی۔