کراچی : متحدہ قومی موومنٹ کی رابطہ کمیٹی کے ڈپٹی کنوینر ڈاکٹرخالد مقبول صدیقی کی سربراہی میں اراکین رابطہ کمیٹی ، حق پرست اراکین سینیٹ، ارکان قومی و صو بائی اسمبلی ، ایم کیوایم کے شعبہ جات کے ذمہ داران اور سیکٹر کے ذمہ داران کا ایک خصوصی اجلاس خورشید بیگم سیکڑیٹریٹ عزیز آباد میں منعقد ہوا ۔
اجلاس میں ملک کی موجودہ سیاسی صورتحال پر تفصیلی غور وخوض کیا گیا، اس موقع پر ایم کیوایم کی رابطہ کمیٹی کے اراکین ڈاکٹر فاروق ستار ، حیدر عباس ضوی ، کنور نوید جمیل، کنورخالدیونس ، بابر غوری ، نسرین جلیل ، احمدسلیم صدیقی ، اسلم آفریدی، خالد سلطان اور کہف الواری، موجود تھے۔
اجلاس سے خطاب کرتے ہوئے ایم کیوایم کی رابطہ کمیٹی کے ڈپٹی کنوینر ڈاکٹر خالدمقبول صدیقی نے کہا کہ ملک کی موجودہ سیاسی صورتحال میں جمہوریت کے فروغ اور استحکام کیلئے قائد تحریک الطاف حسین کی کاوشیں مثالی ہیں، وہ محب وطن اور قوم کا درد رکھنے والے لیڈر ہیں اور ان کی جراتمندانہ پالیساں آئندہ بھی ملک بھر کے مظلوم عوام کے لئے امید کی کرن ہیں ۔
اجلاس میں کہا گیا کہ دارالحکومت اسلام آباد میں پاکستان عوامی تحریک اور تحریک انصاف کی جانب سے اپنے مطالبات کے حق میں احتجاجی دھرنے دیئے جارہے ہیں اور وقت کا تقاضہ ہے کہ حکومت دانشمندی کا مظاہرہ کر تے ہوئے افہام وتفہیم سے معاملات حل کرے ،تاحال حکومت سیاسی بحران کے خاتمے کے لئے موثر اقدامات نہیں کررہی ہے ۔
اجلاس میں حکومت سے پر زور مطالبہ کیا گیا کہ احتجاجی دھرنے دینے والی جماعتوں کے جائز مطالبات پر سنجیدگی سے غور کیا جائے اور سیاسی بحران کے خاتمے کیلئے بات چیت اور مذاکرات کا راستہ اختیار کیا جائے۔
اجلاس میں دھرنا دینے والی جماعتوں کے سربراہان سے بھی اپیل کی گئی کے وہ صبر وتحمل کا مظاہرہ کریں، اجلاس کے آخر میں پاکستان کی سلامتی وبقاء اور عوام کے جان ومال کے تحفظ کیلئے خصوصی دعائیں بھی کی گئیں۔
