لاہور: سابق صدر آصف زرداری لاہور پہنچ گئے، وزیراعظم کی دعوت پر آصف زرداری سیاسی تناؤ کم کرنے کے لئے ملاقات کریں گے جبکہ زرداری چوہدری برادران سے ملاقات اور جماعت اسلامی کے مرکزکا بھی دورہ کریں گے۔
جب انقلاب اور آزادی مارچ والوں کو منانے کی تمام کوششیں نتیجہ خیز ثابت نہ ہوسکیں، تو نوازشریف نےآصف زرداری کو سیاسی تناؤ پر قابو پانےکے لئے آج ظہرانے پر مدعوکرلیا، سیاسی صورتحال میں آج اہم موڑ آنے کا امکان ہے۔
وزیراعظم کی ضیافت میں سابق صدر زرداری سیاسی لقمے دیں گے، آصف زرداری نے اپنے دور حکومت میں اسی طرح کے مظاہرے سے نمٹا۔
رائے ونڈ میں وزیراعظم کی ٹیم عبدالقادر بلوچ، اسحاق ڈار، خواجہ آصف اور سعدرفیق پر مشتمل ہوگی جبکہ آصف زرداری کے خورشید شاہ، رضا ربانی اور اعتزاز احسن ہمراہ ہوں گے۔
ذرائع کے مطابق وزیر اعظم کی دعوت کے بعد لاہور میں چوہدری برادران بھی سابق صدر سے ملاقات کریں گے، آصف زرداری جماعت اسلامی کے مرکز منصورہ کا دورہ بھی کریں گے۔
