کراچی: سابق سینیٹراور مشہور سیاست دان فیصل رضا عابدی کا کہنا ہے کہ پاکستان کے تمام رہنماء بالاخر مارشل لاء کی مجازی قسم پرراضی ہوہی گئے ہیں۔
اے آر وائی نیوزکے ٹاک شو ’اب تک ‘میں ملٹری کورٹس کے قیام سے متعلق گفتگو کرتے ہوئے ان کا کہنا تھا کہ’’پاکستان کے خود ساختہ حکمران دہشت گردوں کو سزائیں دینے سے کتراتے رہے اور اب مجبوراً عوام کے دباؤ ملٹری کورٹ قائم کئے جارہے ہیں‘‘۔
انہوں نے جمہوری حکومت کے اس عمل کو ’جمہوری مارشل لاء ‘سے تعبیر کیا، یہ ایک نظریہ ہے جس کی وہ گزشتہ ایک سال سے ترویج کررہے ہیں۔
انہوں ہیومن رائٹس کی تنظیموں کو شدید تنقید کا نشانہ بناتے ہوئے کہا کہ آج دہشت گردوں کی سزاؤں کے خلاف بولنے والی یہ تنظیمیں اس وقت کہاں تھیں جب یہ دہشت گرد معصوم عوام کو ماررہے تھے۔
یہاں یہ بات قابلِ ذکرہے کہ پاکستان کی سیاسی اور عسکری قیادت نے بدھ کے روز ایک جامع انسدادِ دہشت گردی منصوبے پر اتفاق کیا تھا جس کے تحت ملٹری کورٹس کا قیام، دہشت گردوں کے ٹھکانوں کو نشانہ بنانا، انکی امداد اورآمدورفت کو روکنا شامل ہیں۔
