اسلام آباد : وزیراعظم نواز شریف نے سزائے موت کے قیدی صولت مرزا کی پھانسی کی سزا تیس دن کے لیے مؤخر کردی ۔ صدر نے سمری پر دستخط کر دیئے۔
واضح رہے کہ صولت مرزا کو انیس مارچ کو پھانسی دی جانی تھی۔ پھانسی سے چند گھنٹے قبل ایم کیوایم کے سابق کارکن صولت مرزا کے بیان کی ویڈیو ٹی وی چینلز پر نشر ہوئی تو جیسے کراچی سمیت ملک بھر میں زلزلہ آگیا۔
ایوان صدر نے صولت مرزا کی پھانسی باہتر گھنٹے کے لیے مؤخر کردی اور صولت مرزا سے مزید تفتیش کے لئے کمیٹی بنادی گئی۔
پھر وزارت داخلہ نے ویڈیو بیان کی تفتیش کرنے والی کمیٹی یہ کہہ کر تحیل کردی کہ صولت مرزا کے ڈیتھ وارنٹ دوبارہ جاری ہوچکے ہیں اور اسے یکم اپریل کو پھانسی دیدی جائے گی جس کے بعد تحقیقات کا کوئی جواز نہیں ۔
مگر اب خبر آئی ہے کہ صولت مرزا کی پھانسی تیسری بار موخر کردی گئی ہے۔ اس طرح صولت مرزا کو تیس دن جینے کی مہلت اور مل گئی ہے۔
