کراچی : متحدہ قومی موومنت کےرہنماءحیدرعباس رضوی کا کہنا ہے کہ علی حسنین بخاری کا قتل ایم کیوایم کا بڑا نقصان ہے، لاپتہ کارکنوں کے اہل خانہ کی امیدیں ان سے وابستہ تھیں۔
کراچی میں ایم کیو ایم لائرز فورم کے سرگرم رکن علی حسنین بخاری کے بہیمانہ قتل کے خلاف پریس کانفرنس کرتے ہوئے حیدر عباس رضوی نے کہا کہ علی حسنین کا خلاء کبھی پرنہیں ہوسکتا۔
ان کا کہنا تھا کہ’’ایم کیو ایم کے خدشات درست ثابت ہورہے ہیں ان کے کارکنوں کو چن چن کرقتل کیا جارہا ہے‘‘۔
حیدر عباس رضوی نے کہا کہ عدالت نے علی حسنین بخاری کی جانب سے دائر کردہ درخواست کو آئینی پٹیشن میں تبدیل کیا جس کے لئے ایم کیو ایم چیف جسٹس فیصل عرب اوربارکونسل کی شکرگزارہے۔
ان کا کہنا تھا کہ علی حسنین ایم کیو ایم کے لاپتہ کارکنوں کی بازیابی کے لئے انتہائی سرگرم تھے اوران کے قتل سے لاپتہ کارکنوں کےاہل خانہ کوشدید دھچکا پہنچا ہے۔
انہوں نے میڈیا کو مطلع کیا کہ ایم کیوایم کے قائد الطاف حسین نے مقتول کے اہل خانہ سے ٹیلی فون کے ذریعے تعزیت کی ہے۔ حیدر عباس رضوی نے کہا کہ مشکل کی اس گھڑی میں ایم کیو ایم علی حسنین کے اہل خانہکے ساتھ ہے۔
حیدر عباس رضوی نے کہا کہ کراچی میں مسلک کی بنیاد پرپروفیشنلز، ڈاکٹرزاوروکلاء کو قتل کیا جارہا ہے جو کہ انتہائی تشویش ناک صورتحال ہے۔
