لاہور : عدالت نے اداکارہ میرا کو گرفتار کرنے کا حکم دیدیا۔
تفصیلات کے مطابق لاہور کی مقامی عدالت نے اداکارہ میرا کے وارنٹ گرفتاری جاری کرتے ہوئے پولیس کو حکم دیا کہ سترہ جولائی کو اداکارہ کو گرفتار کر کے عدالت میں پیش کیا جائے۔
کینٹ کچہری لاہور کے جوڈیشل مجسٹریٹ نے اداکارہ میرا کےخلاف استغاثہ کے کیس کی سماعت کی، اداکارہ میرا کے مبینہ شوہر عتیق الرحمن نے عدالت میں استغاثہ دائر کر رکھا تھا، جس میں موقف اختیار کیا تھا کہ اداکارہ نے ان کے ساتھ نکاح کے باوجود ایک اور نکاح نوید نامی شخص سے بھی کر لیا ہے جو قانونی طور پر جرم ہے جبکہ ڈیفنس میں واقع کے ایک کروڑ روپے مالیت سے زائد رقم کے گھر پر بھی قبضہ کررکھا ہے۔
لہذا اداکارہ کے خلاف قانون کے تحت کاروائی عمل میں لائی جائے۔
دوران سماعت فاضل وکیل نے عدالت کو یہ بھی بتایا کہ ابھی تک اداکارہ میرا کی جانب سے نہ تو جواب جمع کروایا گیا اور نہ ہی وکیل پیش ہوا لہذا عدالتی حکم کی تعمیل نہ کرنے پر اداکارہ میرا کے وارنٹ گرفتاری جاری کیے جائیں۔
جوڈیشل مجسٹریٹ نے عتیق الرحمن کے وکیل کی درخواست منظور کرتے ہوئے ادکارہ میرا کے وارنٹ گرفتارجاری کردئیے اور سترہ جولائی کو اداکارہ کو گرفتار کر کے عدالت میں پیش کئے جانے کا حکم دیا۔
