لاہور: وزیر ریلوے سعد رفیق کی کوششیں ناکام رہیں، لاہور کی عدالت نے ریلوے پولیس کی جانب سے اے آر وائی کے رپورٹرز کے جسمانی ریمانڈ کی درخواست مسترد کردی ہے۔
عوام کے تحفظ کیلئے اے آر وائی کی کاوش حکومت کی نظر میں جرم ٹھہری ہے۔ ریلوے میں سیکیورٹی نقائص منظر عام پر لانا جمہوریت کی دعویدار حکومت کو بہت ناگوار گزرا ہے۔
اے آر وائی کے رپورٹرز ذالقرنین شیخ اور آصف قریشی کو دھر لیا گیا ہے۔ سچ دکھانے کے جرم میں دونوں کو دہشت گردوں اور پیشہ ور مجرموں کی طرح ہتھکڑیاں لگا کر ریمانڈ کے لئے عدالت لایا گیا۔
وزیر ریلوے سعد رفیق اور ان کی پولیس کی جانب سے جسمانی ریمانڈ کے لئے ایڑی چوٹی کا زور لگایا گیا ہے تاکہ اپنی تحویل میں مرضی کے بیان لئےجاسکیں ہیں، لیکن آزاد عدلیہ نے کوششیں ناکام بنادیں ہیں۔
لاہورکی عدالت نے دلائل کاجائزہ لینے کے بعد اے آر وائی کے رپورٹرز کے جسمانی ریمانڈ کی درخواست مسترد کردی ہے۔ پیشی پر ذوالقرنین شیخ کا کہنا تھا کہ خواجہ سعدرفیق کو ریلوے کی کرپشن دکھائی تھی۔ انھوں نے بتایا پولیس اہلکار کہتے ہیں کیس میں سعد رفیق کا دباؤ ہے۔
اے آروائی کے نمائندے آصف قریشی نے عزم دہرایا کہ حق اور سچ کی آواز بلند کی ہے اور کرتے رہیں گے اور آزاد عدلیہ کے فیصلے کے بعد قانونی تقاضوں کے تحت ضمانت کی درخواست دائر کردی گئی ہے۔
واضح رہے کہ ریلوے حکام کی ملی بھگت سے اسلحہ غیرقانونی طور پرپاکستان کے ایک شہر سے دوسرے شہرمنتقل کرنے کی خبرمنظرِ عام پر لانے کے جرم میں کل سے پولیس کی تحویل میں اے آروائی نیوزکے نمائندوں کو آج عدالت میں پیش کردیا گیا ہے۔ ذرائع کے مطابق ریلوے پولیس نے اے آر وائی کے نمائندوں کا ریمانڈ لینے کے لئےعدالت سے استدع کی تھی۔
