سابق سری لنکن کپتان مہیلا جے وردھنے نے ٹیسٹ کرکٹ سے ریٹائرمنٹ لینے کا فیصلہ کرلیا۔
جنوبی افریقہ اورپاکستان کے خلاف ٹیسٹ سیریز جے وردھنے کےکیرئیر کی آخری سیریز ہوگی۔ سابق سری لنکن کپتان کا کہنا ہے کہ ٹیسٹ کرکٹ چھوڑنے کا فیصلہ آسان نہیں تھا لیکن انہوں نے بہت سوچ سمجھ کر یہ قدم اٹھایا ہے۔ وہ سمجھتے ہیں ٹیسٹ کرکٹ کو خیر آباد کہنے کا یہ صحیح وقت ہے۔ تاہم وہ ون ڈے کرکٹ جاری رکھیں گے۔ جے وردھنے نے کہا کہ اٹھارہ سال تک سری لنکا کی نمائندگی کرنا ان کے کے لئے اعزاز کی بات ہے۔
جے وردھنے نے انیس سو ستانوے میں بھارت کے خلاف ٹیسٹ ڈیبیو کیا۔ وہ اب تک ایک سو پینتالیس ٹیسٹ میں سری لنکا کی نمائندگی کرچکے ہیں جس میں انہوں نے پچاس کی اوسط سے گیارہ ہزار سے زائد رنزبنائے۔ جے وردھنے طویل دورانیئے کی کرکٹ میں تینتیس سینچریاں بھی بناچکے ہیں۔
