مسلم لیگ ق کے سربراہ چوہدری شجاعت حسین نے آئین کے آرٹیکل چھ میں ترمیم کا مسودہ سینیٹ کو ارسال کردیا۔ مسودے میں کہا گیا ہے کہ آئین کے آرٹیکل چھ کی ذیلی دفعات ایک ، دو، تین میں لفظ ہائی ٹریژن کو مملکت کے خلاف جرم کے متبادل الفاظ سے بدل دیا جائے۔
چوہدری شجاعت حسین کے مسودے میں کہا گیا ہے کہ ہائی ٹریژن (غداری) کا لفظ جو آرٹیکل چھ میں استعمال ہوا ہے اس سے تاثر ابھرتا ہے کہ اس جرم میں ملوث شخص نے دشمن قوتوں کے ساتھ مل کر مملکت کے منافی کام کیا ہے۔ یہ تاثر درست نہیں ہے۔
اس لیے ہائی ٹریژن (غداری) کو مملکت کے خلاف جرم سے بدل دیا جائے، تعزیرات پاکستان کی دفعات ایک سو اکیس سے ایک سو تیس تک بھی اس طرح کے الفاظ سے بدل دیا جائے۔ کریمنل لا ایکٹ انیس سو تہتر میں بھی متبادل تبدیلی کی جائے۔
